Vawiin khan Mizoram Information Service (MIS) leh Mizoram Finance & Accounts Service (MF&AS) foundation course training zawh fel a ni a. Administrative Training Institute (ATI) Conference Hall-ah kharna inkhawm tawi buatsaih niin Information & Public Relations Department Director Pu David L. Thangliana chu khuallian a ni.

Pu David L.Thangliana chuan sawrkara hna pawimawh tak chelh mek leh chelh chho tur an nih angin training chhuakte chu mipui leh sawrkar rawngbawl tur an nih hre reng turin a chah a. An hna chu intihlal nan emaw sum siam nan emawa hmang lovin Pathianin ram tana malsawmna an nih theih nan a dah tih hriaa rinawm leh taima taka hna thawk turin a fuih. I&PR Director chuan mipui leh sawrkar inkara inlaichinna tha siamtu an nih a pawimawhzia sawiin anmahni dawrtu mipuite lakah intivei lova dawh thei taka awm thin tur leh mahni hnaah theuh theih tawp chhuah a, midangte entawntlaka awm turin a fuih bawk a ni.

MIS officer pahnih leh MF&AS officer pariat te hi vawiin khan khuallian hian certificate a hlan a. Foundation Course training hi June thla tirah tanin vawiin hian khar a ni. Course Director, ATI Joint Director ni bawk Pi Angela Zothanpuii chuan kharna inkhawm hi kaihhruaiin training course an kalpui dan tlangpui te a sawi a ni.