Chief Minister Pu Lal Thanhawla chuan 'engineer-te hi hmasawnna ruhrel siamnaah an pawimawh hle a ni' a ti. He thu hi engineer rual intawhkhawm, vawiina Mid Term Council Meeting of Indian Engineers Federation (INDEF) (North Eastern Region(NER), Tourist Lodge, Chaltlanga neiha a sawi a ni.

Chief Minister chuan kum 20 chhung rambuai avangin Mizoramin hmasawnnaah a hnufual phah nasa hle a ni tiin, hemi chhung hian thingtlang khua te chu sawi danglamin, Aizawlah awmze neia hmalakna awm hmasa lovin kan inbengkhawm a, tunah chuan kan tawt hle tawh a ni a ti a. Pawnlam atanga engineer rual lokal te chu thlenna nuam leh tha kan pe thei lo chu pawi a tih thu sawiin, khualchhawn thiam leh belhchiandawl hnam kan nih erawh min hriatpui turin a chah a ni. India ram hi hnam chi hrang hrang chenna anih angin hnam tin hi kan inhre hle tur a ni tiin, Pu Hawla chuan hmun hrang hrang a tlawh tawhna thinah, ram hruaitu in ti thenkhatin ramdangmi ni a an ngaih thin thu leh Mizoram awmna pawh hre lo an awm thin chu a vanduaithlak hle a ni a ti a. India mi vek kan nih angin inpumkhatna tha awm tur chuan kan nihna inpawmpuia, kan inhriat tawn hi a pawimawh hmasa a ni Chief Minister chuan a ti.Mizoram hi mi tlawh tlem ber state leh pawnlama langsar lo ber state kan nih avanga heng thute hi sawilang anih thu a sawi a. Phai lam journalist thenkhat, Aizawla zankhat chauh riaka lokal ten Mizoram chanchin hre ber awm ang leh dik tawk lova an ziak mai thin chu pawi a tih thu Pu Hawla chuan a sawi bawk.

Chief Minister chuan India ram economy thang chak tak hi khawvela a ber kai mai thei a nih thu sawiin, central leh state sorkar te pawhin hmasawnna ruhrel siam hi hna hmasa berah a dah a ni a ti a. Hei hi central programme. PMGSY te, IAY etc. ah te a hriat a ni a ti. Kawngpui tha nei turin leh project lian tham thawk turin World Bank leh Asian Development Bank te chhawr a ni tiin, heng hnathawhah hian engineer te chu an pawimawh hle a ni a ti a. Engineer-te chu hna an thawhah quality dah pawimawh ber turin a chah a. Hmarchhak state dang ang thoin hmasawnna hnathawh hi Mizoram state engineer ten an thawk a.Engineer te chu tehnocrats an nih angin, technology thar ber zela intuaihriam thin turin kalkhawmte chu a chah a. India hmarchhak hi ruahtui tlak tamna hmun anih avangin an hnathawhte chu tlo tur leh daihrei tur chi a thawk turin Pu Hawla chuan a chah bawk a, hmasawnna hna an thawh reng rengah environment ti chhe lo zawnga thawk turin engineer-te chu a chah bawk a ni.

INDEF ah hian engineer hrang hrang Central Water Commission hnuaia engineer te, Railway ami te, BSNL te, Irrigation engineer te leh a dang engineer zawng zawng a huap vek a, zone hrang hrang 6 ah thenin, NER bik hi kum 2005 khan zone pakhat anga din a ni a. Hmarchhak state zawng zawng, Sikkim tiamin a huam a ni. Tun tuma meeting-ah hian remchan lohna avangin Arunachal Pradesh leh Sikkim aiawh te an tel theilo a ni. Meetingah hian INDEF Chairman nilai, Maharashtra mi Er. AB Thakare leh Chairman kalchhuak ta Karnataka mi Er. M.Nagaraj te pawh telin thusawina te an nei a. An ni pahnih hian Chief Minister Pu Lal Thanhawla chu hotu nih tling, hotu tha tiin, meeting-a sawiho tura duan, Engineer mi ngei sorkar Secretary a dah tih leh 6th Central Pay hman ve chu Mizoramah alo tih puitlin daih tawh avangin mipui mamawh, abikin engineer te mamawh hria an ti a, hotu ropui tak a ni an ti. INDEF(NER) President Er.Chinmoy Deb Nath leh Secretary General Er.Bikash Roy Medhi leh Er.Liansanga, Secretary, PWD Mizoram ten thu an sawi bawk.

Meeting hi Mizoram Engineer Service Association in a bultum a ni a. Meeting session hnihna ah thurel tur 12 an chhawpchhuahte sawihona an nei nghal a ni. Council Meeting hi Meghalaya Engineer Service Association-in thleng ve lehin kumin kum tawp-ah neih leh a ni ang.

Chief Minister hian INDEF (NER) News Bulletin a tlangzarh bawk a ni.