Nimin khan Power and Electricity Engineer-in-Chief Pu CL Thangliana office ah Tuvai Hydel Project, Megawatt 210 pechhuak thei tur tender chu sign fel a ni ta.

Tender sign-na inkhawm tawite P&E Engineer-in-Chief  office a neihah E-in-C Pu CL Thangliana chuan thu sawiin Mizoram kawlphetha indaihlohna nasa tak karah State mamawh phuhruk turin theihtawp chhuahin sorkar a tang a, harsa taka beih a nih hnuah Central Sector pawh nilo State Sector-ah Tuivai Hydro Electric Project Tender koh a ni ta chu Mizoram tana thil chhinchhiahtlak tak, Mizo mipuiten nasa taka kan la chhawr tur a ni, a ti a. PHE load pek loh chuan MW 80 in load shedding ngai lova Mizoram a chawm theih laiin MW 210 zet pechhuak thei tur tender koh phalna tihchhuah a ni ta hi a lawmawm tak zet a, Chief Minister Pu Lal Thanhawla hmalakna leh Dept. mi leh sa te thahnemngaihna vang a ni, Pu CL Thangliana chuan a ti a. Serlui B Hydel Project chungchang pawh tarlangin Construction work pangngai peihfel ni tawh mahse tuikhuah atanga tui lakna Gate a tui chhuak zat Control a la harsat avangin hman theih a ni loh thu a tarlang a. Heng harsatnate hi chinfel a nih hunah Serlui B Hydel Power pawh hawn theih a ni ang, a ti.

Megawatt 210 pe chhuak thei tur Tuivai Hydro Electric Power Project tender hi 2010 behchhana estimate siam chu cheng vaibelchhe 1750.6 a ni a. Public Private Partnership (PPP) mode a kalpui tur a ni.