Vawiin khan Environment & Forests Department-a DFO chinte chuan an Minister Pu H. Rohluna hovin PCCF Office Conference Hall, Tuikhuahtlang-ah meeting pawimawh tak an nei a. Kum kal taa an hmalakna te leh kumin chhunga an hmachhawp tur te huam zau takin an sawiho a ni.

Minister chuan Mizoram hmun hrang hranga a zinna ah Forest Department-in kawngpui dunga an thingphun te a hmuh thin thu sawiin a bik takin District Council Area huamchhungah te phei chuan nasa takin thing an phun a ni tih a hmuh chuan a ti lawm hle a, an hnathawh a entawn tlak hlea a hriat thu a hrilh a. Forest Division leh Range thenkhatah an hmalaknate hmuh theih maia a awm laiin a thenah chuan beisei ang a phak lo hle a, chuvangin a rualkhai zawka hna an thawhho theihna turin harsatna leh tanpui an ngaihna laite meeting-ah hian sawiho a rawt a. Kuminah hian kangmei kan tuar nasa a, chenna in bakah ram pawh a kang nasa hle chu pawi a tih thu sawiin Pu H. Rohluna chuan Mizoram chhunga forest cover a kiam nasa lutuk chu engtinnge humhalh zel dan tur chu meeting-a ngaihtuah tur pawimawh tak a tling a ni, a ti. Mizoram Forest Department enkawl lai National Park, Wildlife Sanctuary leh Department hmunhma dangte tun aia uluk zawka enkawl dan tur pawh sawiho a rawt bawk a. Kum tira inhmuhkhawm hi duh tawk mai lovin, kum laihawl velah pawh an hmalak tawhna hrang hrang te thlirhona hun ruahman a tul a tih thu a sawilang a ni.

PCCF Pu S.S. Garbyal chuan tlangram lo vahin ramngaw thalai namen lova a ti chereu thin a ngaihmawh thu te leh tuna ramngaw la awm ang ang te chu uluk taka vawnhim leh thingphun lamah pawh tan lak leh zual a tul thu a sawi a ni. Sorkar Department zawng zawngte chu ‘Citizen Charter’ neih vek tura phut an nih angin E&F Department chuan a peihfel tawh a, Minister pawhin a pawmpui fel tawh thu a sawi a; Charter hi a rang thei ang berin Mizo tawnga dah a nih tur thu a sawi bawk. Pu Garbyal chuan tunlai khawvel hmasawnna chak tak man pha turin Department chuan official website thar a neih tawh thu leh hei hi mipui mimir pawhin hmang tangkai turin a chah a ni.

Tun dinhmunah Mizoram forest cover area chu 19,117 sq.kms. a ni a, state len zawng hisap chuan zaa 90.68% a ni. Recorded Forest Area chu 16,717 sq.km. niin Reserve Forest 47.31%, Protected Forest 21.34% leh Unclassed Forest Cover 31.35% a ni a; 1241 sq.km. chu Protected Area a ni bawk. Mizoram-ah E&F Department hnuaia Scheme kalpui mek te chu - National Afforestation Program, Integrated Forest management, Greening Mizoram, National Bamboo Mission, Green India Mission, JICA leh Finance Commission Grants te a ni a. Tun hnai khan Green India Mission hnuaiah cheng vaibelchhe 1 dawn a nih thu leh JICA-in forest training school dinna tur tanpuina a pek thu pawh Pu Rosiama Vanchhawng, Addl PCCF chuan meeting-ah hian a tarlang a ni.