Kum tina an tih thin angin Central YMA leh I&PR Department-te chuan Branch YMA enkawl vengchhung chanchinbute tan ‘Media Workshop’ chu vawiin khan I&PR Auditorium-ah an buatsaih leh a. Khuallian atana sawm I&PR Secretary Pu K. Lalnghinglova, IAS chuan hawngin CYMA atangin Pu C. Chhhuanvawra leh I&PR Dy. Director Pu Lalsiama Fambawl ten chanchinbu kalhmang inkaihhruaina, thuziak dik leh hriattur tangkai hrang hrang zirtirin Workshop chhimtu palai 140 chuangin an zir hova, sawihona hun hlawk thlak tak an hmang a ni.

Workshop hawngtu Pu K.Lalnghinglova chuan tunlai khavwelah media thiltihtheih tawh zia sawiin media hian ‘Lal’ a siam thei a chutiang ang bawkin ‘Lal’ a paihthla thei bawk, a ti. Ram hmasawn zawkah phei chuan media-te hian hna nasa tak an thawk a, misual leh hlemhle te pawh lung inah an um lut thei tawh hial a ni, a ti. Vengchhung chanchinbute pawimawh zia sawi chhuakin I&PR Secretary chuan nitin chanchinbu leh magazine changkang zawkte hian chhungkaw tin a luh kim vek seng lova, chutih laiin Branch YMA chanchinbute erawh chuan chhung tin leh chhungkaw member zawng zawngte a fan chhuak thin avangin an thuziakah fimkhur a tul a ni, a ti a. Vengchhunga chawimawi phu leh thil tangkai turte pholang thiam a, vengchhung mite ngaihsan tur dik tak ‘role model’ siamtu an ni thei bawk, a ti. Tawng hi thang reng a nih avangin tawngkam mawi leh dik hman thiam hram hram a pawimawh dan a tarlang tel bawk. Pu Lalnghinglova chuan vengchhung a ni emaw rampum huap a ni emaw chanchinbu reng rengte chuan an thu lakdawnnaah fimkhur se, a theih phei chuan an thu dawnna (source) te chu tarlang thei thin se thaa a hriat thu a sawi a ni.

Workshop hawnna hi CYMA Vice-President Pu Lalbiakzuala’n a kaihruai a, Asst Secretary CYMA Pu R.L. Rindika pawhin Workshop huaihawt a nih thin dan leh tun hnaia CYMA leh HPC(D) inkar boruak dinhmun a hrilhfiah bawk.

Kumin atana Media Workshop buatsaihah hian khawpui chhung Branch atangin chanchinbu enkawltu mi 140 chuang leh khawpui pawn leh Sub. Hqrs. hrang hrang atangin mi 20 zet an tel thei a ni.