676/2023-2024
Dated Aizawl the 3rd June 2023: Vawiin khan Environment, Forest and Climate change Minister, Pu TJ Lalnuntluanga leh Journalist ten Aizawl Sahuan an tlawh.
He hunah hian EF&CC Minister Pu TJ Lalnuntluanga leh Journalist te chuan inkawmna hun tha tak an hmanga, Pu TJ Lalnuntluanga chuan Aizawl Sahuan chu a changtlung sawtin tlawhtu pawh an thahnem sawt hle a, tun hnaia Animal Exchange Program hmanga Sakei pahnih dah luh a nih hnu phei chuan tlawhtu an thahnem lehzual a ni, a ti. Sahuan-ah chuan ramsa te dah luh tur awm nual mahse hmunhma zau zawk neih a nih loh avangin dah luh mai a remchang thin lova, tunhnaiah Master Plan of Aizawl Zoological Park 2019-29 chu Central Zoo Authority in condition neia approval a rawn pek thu sawiin, thawmthat leh cheibawl ngaite cheibawl a,hmunhma zau zawk neih belh a nih hnu phei chuan Sahuan changtlung tak a la ni chho dawn a ni, a ti.
Pu PC Laltanpuia, Deputy Conservation of Forest, Wildlife chuan report tawi pein ramsa te awmhranna tur bik hi tun dinhmun ah hmun 29-ah siam a ni a, native species leh exotic species(mizoram chhunga awm ngailo) te an awm nual thu sawiin, exotic species phei chu 49 lai an awm a ni, a ti. Keipui Royal Bengal Tiger dah luh a nih hnu leh exotic ramsa te lakluh an nih hnu phei chuan tlawhtu an pun belh hle a, report-a a lan danin April 2022-May 2023 chhungin tlawhtu mi 63,037 an awm a , sum hmuh zah pawh Rs 14,66,820.00 lai a ni, a ti.
Aizawl Zoological Park, Sakawrtuichhun hi November ni 24 2006 ah hawn niin , Enclosure (ramsa te Chenna tur bik) 29 siam a ni a, Breeding Centre (inthlahpunna atan bika hmun siam) 4 a awm bawk a ni. Sahuan hi a theih anga tih changtlun chhoh zel a ni a, Zoo Animal Exchange Program hnuaiah Central Zoo Authority phalna in State dangte nen ramsa lakluh leh pek chhuah thin a ni bawk. Exotic species-ah phei chuan India ram sahuan danga vang em em Cassowory bird te, Patas monkey leh ramsa chi hrang hrang an awm nual a ni.
Vawiin Sahuan fanna program-ah hian Environment and Forest Minister bakah, Pu RK Singh, Principal Secretary EF&CC, Forest Department hotute, I&PR , Journalist-te leh Sahuan enkawltute an tel a ni.
Attachment
- Loading attachment...
