3507/2024-2025

Aizawl dated 13th December 2024: Vawiin chawhma khan Pu Lalthansanga, Minister, Environment, Forest & Climate Change Department chuan a pisaah Thorang Wildlife Sanctuary chhung a Dampui ‘S’ khua a chhungkaw 6-te hnen ah ‘1st Installment of Reallocation Fund’ cheng nuai 8 theuh a hlan.

He hun a tarlan danin Wildlife Protection Act 1972 Section 26A hnuai ah Thorang tlang chu ni 23, April 2002 khan Wildlife Sanctuary-a pawm a lo nih tak avangin Dampui ‘S’ khua ah ‘National Rehabilitation and Resettlement Policy 2007’ hnuai a Option –I Reallocation Plan kalpui a lo ngai ta a. Wildlife Sanctuary tha leh changtlung, ram ngaw leh nungchate tha zawk a humhim hna kalpui a nih theih nan he khua a chhungkaw chengte insawnchhuahna turin zangnadawmna cheng nuai 10 zel ruahman a ni.

Kum 2011 khan Dampui ‘S’ atang a insuanchhuahna tur, Reallocation Plan kalpui tur a ruahmanna siam a nih khan chhungkua 61 awm ang a chhinchhiahte atanga chhungkaw 44-te hnen ah Reallocation Fund 1st Installment hi pek chhuah a ni a. Kum 2014 khan chhungkaw 47 chuan 2nd Installment leh Final Installment hi an dawng a, hemi kum tho hian chhungkaw 6-te chuan 1st leh 2nd Installment hi an dawn bak ah kum 2015 khan chhungkaw 2 chuan dawng lehin Reallocation Fund chu chhungkaw 55 hnen ah semchhuah a ni ta a ni.

Chhungkaw 6, hetih hunlai a insawnchhuak ve ta lote chuan insawnchhuah rem an tih tak avangin Deputy Conservator of Forest (WL), Aizawl, Thorangtlang Wildlife Sanctuary in-charged ni bawk chuan a tul hma la chhunzawmin inremna tha tak a siam a ni ta a. Vawiin hian heng inbiakna, thawhhona leh inremna avangin hian Thorang Wildlife Sanctuary-a nungcha leh ram ngaw humhalh kawng ah hmasawnna nasa zawk a thlen ngei beisei a nih thu tarlan a ni a. Chhungkaw 6-te hnen ah hian 1st Installment cheng nuai 8 theuh Forest Minister hian a hlan bak ah 2nd Installment cheng nuai 2 pawh an in sawn chhuah veleh a pek nghal theih tura ruahmanna siam lawk tawh ani. 

He ruahmanna cheng nuai 8 pek a, an in sawn chhuah fel hnu a nuai 2 pek leh hi sawrkar leh chhungkaw 6 ten a inremna affidavit an siam hnan thlap ani. 

Pu Pee Lee Ete, IFS, Chief Wildlife Warden, Mizoram chuan he hun hi kaihruaiin Pi Margaret Lalramchhani, IFS, Deputy Conservator of Forest (WL), Aizawl chuan lawmthu sawina hun a hmang.