No.3255/2020-2020

Dated Champhai, the 20th July,2020 (Monday): Environment Forest & Climate Change (EF&CC) Minister leh Champhai South bialtu MLA ni bawk Pu T.J. Lalnuntluanga chuan vawiin khan a bial chhung khaw hrang hrangte tlawh chhunzawm zelin, HSSLC leh HSLC Compartmental exam result puan taka hlawhtlinna changte fuihna leh lawmpuina hun a hmang.

Pu T.J. Lalnuntluanga chuan zirlaite chu an thil tih kawng tinrengah Pathian thu awiha, an hlawhtlinna chanin nakin zelah enge a thlen ang tih ngaihtuah thin tur leh lehkha an zir theihna tura puitute hre renga, midangte puitu nih tum thei turin a chah a. Hlawhtlinna an chan hnuah pawh rilru diklo leh ngaihtuahna hrisel lo te nei lo a, rinawmna, taimakna leh dikna nena nun kawng zawh tum turin a fuih a. Lehkhathiamna chu Office hna atan chauh nilo kut hnathawh kawngah pawh hlawk leh tha zawka tharchhuah theihna tura thiamna petu a ni thei tih hrethiam tura fuihin, hmabak awmah a eng zawng thil thlir thiam turin a chah bawk.

Minister chuan kan ramin a mamawh ber chu thil ti tak tak mite an nih thu sawiin, zirlaite chu tum mumal tak neia chhungkua leh khawtlang tana innghahna tlak nih tum theuh turin a chah a. An hma hunah harsatna leh paltlang ngai tam tak a la awm dawn thu hrilhin, chung hunah chuan rilru fim tak pu tur leh tih tur hlen chhuak turin harsatnate lo dawnsawn dan thiam thei tura inpuahchah lawk angai a ni, a ti a. Bialtu MLA chuan zirna chungchanga harsatna neite tan engtiklai pawha a inhawn reng thu a sawi a. Bial mipuite chu midangte tana malsawmna ni tur leh ram leh hnam tana tha thawh ve tura rilru siam tura fuihin, ram sum leh pai siam that nan intodelh a pawimawh hmasa a, chumi tur chuan hna te leh sang lua a awm lova, mahni indahhniam mai lovin phur takin kan thawk zawk tur a ni, a ti. Zirlai hlawhtlinna changte thinlung taka a lawmpui thu sawiin, an kal leh zelna turah duhsakna a hlan a ni.
Bawrhsap Pi Maria C.T Zuali chuan zirna uar deuh deuh angaih thu sawiin, lehkha thiam thei nazawng an hlawhtlin vek loh thu leh taima taka beitututen hlawhtlinna an chan thin thu a sawi a. Zirna chu hnathawh thiamna tura puitu pawimawh tak anih angin mitin ten kan ngaipawimawh tur ani, a ti a. Zirlai atanga thiamna neihte chu a tak ngea hman tangkai kan tum tur a ni, a ti bawk.

Pu T.J. Lalnuntluanga chuan vawiin hian Zirlai hlawhtlinna chang Zotlangah 28, Ruantlangah 10, Mualkawiah 4, Dilkawnah 4, Kelkangah 5, Melbukah 3, Zokhawtharah 21, an vaiin mi 75 te hnenah lawmpuina thilpek Dictionary a hlan a ni. Champhai Zotlang VC atangin CM Reilef Fund-a chhunluh tur tanpuina sumfai a dawng bawk.

Tukin khan Minister leh Champhai Bawrhsap Pi Maria C.T Zuali te chuan Govt. Zotlang Comprehensive Middle School bula leimin chu tlawhin hmalak dan tur an enfiah a ni.