No.3254/2020-2020

Vawiin khan School Education Minister Pu Lalchhandama Ralte chuan a office chamber-ah tunhnaia HSSLC result chhuaka Arts stream topper Lalhlimpuii do Vanlallura, Darlawn lawmpuina hun a hmang.

Minister Pu Lalchhandama Ralte chuan Lalhlimpuii chu khawhmuhna mit lamah harsatna nasa tak tawk ni mah se, harsatna buan hneha topper a ni thei hi a ropui a tih thu a sawi a. Harsatna lian tak piaha Lalhlimpuii hlawhtlinna chu Tuivawl bialtu anihna ang leh School Education Minister anihna-in a lawmpui thu a sawi a ni. Minister chuan a bial chhungah hetiang mi chhuanawm tak an awm chu lawmawm a tih thu a sawi a, a kal zelnaah hlawhtlinna a chan theih nan duhsakna a hlan a, a thil tumah a hlawhtlin ngei a beisei tih a sawi. Lalhlimpuii hlawhtlinna chu midangte tan chona anih bakah amah ang bawka harsatna tawkte beidawng mai lova fuih phurtu a ni nghal a ni, a ti a.

School Education Minister hian Lalhlimpuii hi lawmpui nan leh a zir chhoh zelna puitu atan Laptop a pe a, Pi Esther Lalruatkimi Commissioner & Secretary-in Civil Service Preliminary leh Mains Exam atana inbuatsaihna tur lehkhabu a pe bawk.

Pi Esther Lalruatkimi, Commissioner & Secretary pawhin he hunah hian thu a sawi a. Lalhlimpuii'n Civil Service lam a tum chu lawmawm a tih thu leh he lamah hian Mizote tan nasa taka tan lak tul a tih thu a sawi a, tunah hian Mizoram sorkar hna pawimawhah hnamdang an awm nual tawh avangin zirlaiten Civil Service chu an tum tak tak a hun hle a ni a ti bawk. Result chhuah hlimah lungawi lo deuh mahse, sorkar timualpho zawng ni lova zawldawh taka hma an la chu lawmthu a sawi bawk

Lalhlimpuii hi a tet lai atangin a mit a chak lova, a chhungten a mit chak loh dan hi an hre mai lova, a kal velin bangte a sut tak fo avangin a mit a tha lo tih an hre ta a, sikul pangngaiah pawh kal lovin pawl 1 atanga pawl 5 thleng chu Special Blind School Durtlang-ah a kal a, hemi chhung hian pakhatna a ni tluan parh a. Pawl 6 atangin Darlawn-ah zirna a chhunzawm a, HSLC Exam Distinction-ah a pass a, top ten-ah a lang lo deuh chauh a ni. Pawl XI ah hian a mit that loh avangin School thenkhat chuan enkawl an huphurh a, amah hian lehkha zir zel a chak bawk si nen St Joseph's Higher Secondary School-in enkawl theih inbeiseiin an admit ta a ni.

Minister-in topper lawmpuina hun a hmanah hian Pi Esther Lalruatkimi Commissioner & Secretary, Pu James Lalrinchhana, Director leh Pu Lalhmachhuana,SPD Samagra Shiksha ten Minister hi an tawiawm a, Darlawn khaw chhuak Welfare hruaitute an tel bawk a ni.

Attachment

  • Loading attachment...