Mizoram sorkar thara Environment & Forest Minister Pu Lalrinmawia Ralte hovin vawiin khan Environment & Forest Department-a thawktute chuan PCCF Conference Hall-ah inhlantharna hun an hmang.
Pu Lalrinmawia Ralte chuan Environment & Forest Department-a thawktute chu Pathianin a siam, a enna a duh em em, ramngaw leh nungcha te enkawltu leh humhalhtu department pawimawh tak an nih thu a sawi a. Khawvel hmasawnna leh thiamna thang zelah, ngaihtuahna thar leh beih dan tha leh tangkai zawk duang chhuak a, hmasawnna programme awmsa te nena kaihkawp theih turte ngaihtuah tlan a tul thu a sawi a. Ram mipuiten Department thil tum leh kalphung te an hriat lehzual nan leh, mipuite nen thawhhona tha an neih theihnan inhrilhhriat uar lehzual turin a chah bawk. Minister chuan Forest Department-a thawktute chu amah hrilh hretu, thurawn petu leh kawng dik kawhhmuhtu ni tura chahin; ram leh hnam tan mahni theihna zawn theuhah, taima leh lungrual taka an hna theuh hlenchhuak ngei turin a fuih bawk.
PCCF & Principal Secretary, Pu J.L. Singh pawhin thu sawiin, Department hmalakna leh hmachhawpte chu thawktute inhlantharna, taimakna leh tanrualna nen rah duhawm tak a chhuah ngei ang, a ti.
He hun hi Addl. PCCF, Pu Rosiama Vanchhong chuan kaihhruaiin, Pastor P.L.Biakchhawna’n hunserh a hmang a, Pu C. Vanlalena, DCF( Hqrs) chuan lawmthu sawiin hun a khar a ni.
