Kumin Republic Day 2014 Aizawl khawpuia hman dan tur chungchang ngaihtuahin Aizawl Deputy Commissioner Dr Franklin Laltinkhuma kaihhruaina hnuaiah vawiin chhun khan ama Office Chamber ah sorkar department hrang hrang hotute an thukhawm a. Vawiina an thurel langsar zingah chuan Republic Day Aizawla hmanna turah hian Mizoram Governor Pu Vakkom Purushothaman chu Khuallian atan beisei a ni a. A lawmna hmun atan Aizawl Sipai Lammual a ni ang a, Republic Day hi Pathianni-a a tlak a avangin zing dar 7:30 ah ceremony tan tura ruahman a ni.

Kumin Republic Day ah hian Parade Contingent 18 leh Band Party 4 beisei an ni a, heng contingent te hian kar leh ni 20 January zing kar atangin Ramhlun Sports Complex ah lam an zir ang a, Final Rehearsal chu ni 24 January, 2014 (Zirtawpni) ah A.R.Ground ah neih a ni ang. Kum dang ang bawkin hemi ni hian Governor chenna inah sawm bikte tan chhun dar 12:00 ah Thingpui Ruai buatsaih a ni ang a. He ni puala infiamna hrang hrang pawh buarsaih chhoh nghal zel a ni. Social Welfare Department leh DC Office Aizawl bultumin heng Home hrang hrang - Hmangaihte Run, Zemabawk; TNT, Zuangtui; Hermon’s Children Home, Durtlang; Gileads Special School, Falkland; Orphanage Home, Khatla; Hmangaihna In, Durtlang; Friends of Children, Laipuitlang leh First Step Children Home, Edenthar te hnenah hian MHIP Hqrs ten Republic Day Thilpek an hlan bawk ang. Vawiin meeting ah hian 2014 Republic Day lawmna atana department hrang hrang te mawhphurhna bithliah fel nghal a ni bawk.