Kum 2012 atana inhlan tharna leh intuai tharna hun chu vawiin khan an mahni Conference Hall-ah hman a ni a, E & F Minister Pu H. Rohluna’n a hmanpui a ni.

CCF (Admn.) Pu Rosiama Vanchhong, IFS kaihhruaiah hian Minister chuan hma thar hrang hrang kan laknaah hian tun kumtharah hian taima leh rinawm taka kan thawh a tul a ni, a ti a. Kan sakhuana leh kan hnathawh hi a inzawm a, a taka kan lantir a pawimawh hle bakah office hun vawn dik leh hman that a pawimawh hle a ni, a ti bawk.

Forest department a hnathawkte hi kan dinhmun a sang lo a ni thei e, mahse kan mawhphurhna hi a sang hle a, mite entawn tlaka neitu thinlung pu a zirtirtu tur kan ni a, kan ram hi keimahni ngeiin kan siam that a ngai a, midangin min siamthat sak dawn loh avangin kan mawhphurhna a ni. Kan rama sorkar hnathawk mai nilo, mipui mimir rilru puthmang hi a chhe viau tawh a, hemi siam tha tur hian kan pawimawh theih a, rinawm taka kan thawh a ngai a ni, a ti a. Hei bakah hian hnathawktu indaih loh chungchang te, transfer/posting chungchangah pawh dik taka kan kal a ngai a, post tha leh pawisa um zawng ringawta kan kal chuan a tha dawn lo. Thil tha nia kan hriat chu kan ti ang a, mahse duhsak bik kan nei dawn lo, tha taka hna department in a thawh hi ka duhsak che u a ni a ti. Kumhluia thil kal tawh chu theihnghilh a, kum tharah chuan rilru thar, thahnemngaihna thar nen Pathian kaihhruaina dil chungin hma la tur leh thawktu zawng zawngten tluang taka hna thawk theuh turin Pu Rohluna chuan duhsakna a hlan a ni.

He hunah hian 19th All India Forest Sports Meet, Dehra Dun-a 16 - 20, 12, 2011 chhunga Mizoram aiawha infiammi lawmman latute chawimawina hun hman nghal a ni a. Team/state 36 zingah Mizoram chu 13 zuk niin gold 5, silver 3 leh bronze 1 an rawn hawn a. Lawmman dawngtute hnenah hian Minister chuan incentive cash award gold dawngtu hnenah Rs. 5000/-; silver ah Rs. 3000/- leh bronze ah Rs. 2000/- a hlan a ni.