Vawiin chawhnu khan Sihphir venghlun YMA Hall ah Sihphir Branch YMA buatsaih in ramngaw leh nungcha humhalh kawnga inzirtirna leh inhlantharna hun buatsaih a ni a. He hun hi Environment & Forest Minister Pu Lalrinmawia Ralte leh Forest Department hotuten an hmanpui a .

He awareness programme chhimtu, Nungcha leh ramngaw humhalh tlat tura intiam thar zirlai 580 te hnenah chawimawina thuziak Minister hian a hlan a ni. Sihphir ramchhunga awm puansen ram hi herhse leh thing chi hrang hrang te phun in kum 2002 atang khan Sihphir YMA,Village Council leh sawrkar tangrual chuan YMA Sanctuary ah lo siam tawh in a chhunga nungchate leh ramhmul chi hrang hrang te hi tha tak a enkawl mek a ni.

He huna thusawitu Forest Minister Pu Lalrinmawia Ralte chuan Sihphir veng mipui te hmalakna chu thil chhuanawm tak leh khaw hrang hrang te entawn tlak a ni a ti a. Ramngaw leh nungcha te enkawl leh humhalh kawnga piangthar kan pun chhoh zel a ngai a ni a ti a. America ram luah hmasatu red Indian ten nungcha leh ramngaw humhalh na kawnga hma an lo hruai tawhna chu khawvelin tunah chuan a ngaihsan leh a entawn a ni tawh a. Mizoram mipui te pawh kan ram rohlu thing leh mau, ramhmul chi hrang hrang leh a chhunga cheng nungcha te humhalh kawngah kan thanharh a hun tawh tak zet a ni a ti.

Environment & Forest minister hi Pu Liandawla, Chief Wildlife Warden, Pu Lalthangliana Murray, CCF, Pu Lalrinmawia, CF leh mi pawimawh dang ten an tawiawm a ni.