Serchhip District-a MLA Constituency pathum huam chhunga  khaw 10-New Serchhip, Serchhip-II, Serchhip-III, Serchhip-IV, Hriangtlang, Thenzawl, Mualcheng, Chhiahtlang, Chhingchhip leh Khumtung khua te a Environment & Forets Department hnuaia NLUP (2010-2011) beneficiaries  chhungkaw 47, a hmaa 1st instalment tanpuina pawisa dawng tawh leh hma la vek tawh te hnenah an hmalaknate endik anih hnuin 2nd instalment tanpuina pawisa pekchhuah a ni.

Tanpuina hi hmun thumah sem niin June ni 19, 2011 khan Thenzawl-ah sem a ni a, June ni 29, 2011 khan Chhingchhip-ah sem leh niin, July ni 1, 2011 khan Serchhip-ah sem leh a ni. Tanpuina dawngtute hi Serchhip Constituency atangin chhungkaw 24 (New Serchhip-9, Serchhip II-1, Serchhip III-1, Serchhip IV-1, Thenzawl-12) Tuikum Constituency atangin chhungkaw 20 (Chhiahtlang-11, Chhingchhip-7, Khumtung-2) leh Hrangturzo Constituency atangin chhungkaw 3 (Hriangtlang-2, Mualcheng-1) an ni.

Heng chhungkaw 47 hnenah hian NLUP hnuaia an hmalak nan leh 2nd instalment huamchhunga hnathawh tur tuk sa angin ruahtui khawlna tur Tuizem siam sa (Polytop Synthetic tank) chhungkaw 37 hnenah anmahni duhthlanna in pek chhuah mek a ni a, a bak chhungkaw 10-te erawh chuan anmahni duhthlanna in an pawisa dawn atangin RCC tuizem an sa theuh thung dawn a ni. 2nd instalment ah hian chhungkaw pakhat tan Rs. 27,086 theuh a sem a ni a, hetah hian Tuizem siamna tur te, mau phun tur phurhna senso te, a phunna tur khur siamna tur te leh a hmun thlawh faina tur te a tel a ni.