Vawiin khan Aizawl Press Club-ah State Compensatory Afforestation Fund Management & Planning Authority (CAMPA) bultumin ASEP chuan Environmental Photographer mi paruk (6) te hnenah chawimawina Certificate an hlan a. Environment & Forests Minister Pu Lalrinmawia Ralte chu khuallian a ni. Minister hian ASEP President K. Lalmuansanga lehkhabu ziah parukna “Tukloh Lentu” tih chu a tlangzarh nghal bawk.
He hun ASEP President K. Lalmuansanga kaihhruai ah hian E&F Minister Pu Rinmawia chuan, “ASEP-in Environmental Photographer-te hnenah chawimawina certificate hlanna chang an hria hi lawmawm ka ti a. Heng thlalak hlu tak takte hian mi thinlungah nasa takin thu a sawi thei a, awareness ropui tak a tling a. Shoot with Camera, not with a gun tih a taka tidiktu kan pung zel hi thil lawmawm tak a ni a. a ti a. Tuna chawimawina dawngtute thawhrimna leh an inpekna pawh chhuanawm ka tiin an fakawm tak meuh a ni,” a ti bawk.
Environmental Photographer-te chawimawina hi a thawhkhatna atana buatsaih a ni a, ASEP chuan he lam kawnga thahnemngaitute hnenah chawimawina hi hlan zel an tum. ASEP Vice President Hmingthansanga’n lawmthu sawiin, hei hian kan ram environment humhalhna kawngah rah duhawm a chhuah chhoh zel a beisei tak zet thu a sawi bawk.
ASEP HMALAKNA PAWIMAWH THENKHATTE :
1. Mizoram chhunga zirna in hrang hrang 150 chuangah awareness campaign hlawhtling takin neih tawh a ni a, thingtlang khua 100 chuangah neih a ni tawh bawk.
2. Mizoram chhunga survey neihna atanga sapel hrat, ramvah ching, sava veh ching, thangkam ching mi 1500 chuang hnenah sim tura ngenna lehkha thawnchhuah tawh a ni.
3. ASEP hmalakna hian mi parukin silai an surrender tawh a, pakhat phei chu silai license nei lai a ni nghe nghe a. Thang chi hrang hrang 100 chuang leh sairawkherh 800 chuang zet surrender a ni tawh bawk.
4. Environmental booklet, cartoon leh lehkhabu eng emaw zat tihchhuah tawh a ni. Environment humhalh inzirtirna atan Conservation rally, seminars, Consultation meeting, etc. buatsaih thin a ni.
5. Thingkawrawnga bu nei chite tan Artificial Nest Box eng emaw zat siam a ni a, mamawhtute hnenah a thlawna semchhuah thin a ni.
6. Kumtin October emaw November thla hun remchang hmasa berah “Nungcha Hmangaihtute Inkhawmpui” hman ziah thin a ni.
7. Environment humhalhna atan hmun hrang hrangah Signature Campaign neih a ni a, ngawrh takin kalpui chhoh mek zel a ni.
8. Environment humhalhna kawnga thawkthate hnenah Chawimawina Citation hlan thin a ni.
