1709/2022-2023
Aizawl 26th August 2022: Vawiin khan Human Resource Development Board Vice-chairman Pu L.Thangmawia chuan vohbik naupangte tana EPHATHA society of Mizoram in an din EPHATHA Special School, Kulikawn tan Sintex 2000 ltrs. a hlan.

Pu Thangmawia chuan mi thahnem ngaite'n vohbikte tana hma la tura Society hrang hrang an lo din a. Mitdel te tan Samaritan Association for the Blind in kum 2001 khan School tha tak a lo din tawh a, taksa lam a harstna nei (Spastic) te tan Gilead special school chu 1990 khan Spastic society in a lo din tawh bawk a. Tunah hian EPHATHA Society of Mizoram hian taksa lam leh rilru lama harsatna nei lo, mahse bengngawng leh tawngthei lo ni si te tan EPHATHA Special School chu harsa takin kum 2016 khan an lo din bawk a. Heng vohbikte tana thawktu Society zawng zawngte chungah hian thinlung takin lawmthu a sawi a ni.

Hun khirh tak Mizoramin a tawn mek lai hian state sorkar pawhin a tih theih ang ang, heng vohbikte tan ke a pen mek zel a. School Education Minister duhsakna changa School building tha tak luah tur an neih leh computer set an lo dawn tawh chu a lawmpui thu a sawi a. Education Minister in a ruahmansak Grant-in-aid cheng nuai 2 pawh hun reiloteah pek fel an nih tur thu society hruaitute a hrilh bawk.

Pu L. Thangmawia chuan, anmahni thiam loh pawh ni lo vanduaina hrang hrang vanga Mizoram chhunga vohbik dinhmuna ding mekte tan hian mitinin tih theih an nei vek a, hengho tana ding Society te kut a dah mai lovin, a theih ang anga heng vohbikte tana pen chhuak turin mitinte a sawm bawk a. Kulikawn khawtlangin vohbikte dinhmun hria a, a remchan dan ang apianga an lo dawnsawnna leh puih thin naah te lawmthu a sawi a. Mahni sumsenga Upa Denghmingthanga'n an sikul kawt cement concrete a lo siam sak chu lawmawm a tih thu a sawi bawk.