1708/2022-2023
Kolasib dated 26th August 2022: Tukin khan MIZOFED LPG Showroom, Khuangpuilam, Kolasib buatsaihin NEC Collection Centre, Khuangpuilamah 'Pradhan Mantri Ujjwala Yojana' hnuaia Kolasib khaw chhunga chhungkaw 89-te hnen ah a thlawn a LPG Connection pek chhuahna hun hman a ni a. Pu K.Lalrinliana, Minister of State, Food, Civil Supplies and Consumer Affairs chuan he hun hi hmanpuiin Pu Lalhmuakliana, DCSO-in hun a kaihruai a ni.

Minister Pu K.Lalrinliana chuan LPG indaihlohna avanga harsatna mipuiin kan tawh țhin te chu Sawrkar laipui hnenah thlen a nih hnu ah hnianghnar zawk a kan dawn theih nan ruahmanna siam a nih thu leh chung ruahmanna avangte chuan hmasawnna hmuh chhoh mek zel a nih thu a sawi a. PMUY hnuai a hmathatna dawng Kolasib district chhungah țhahnem tak an awm chu lawmawm a tih thu leh he Scheme ina a tum tihlawhtling tur chuan hamthatna dawngtute an pawimawh thu a sawi. Thingtuah hmang a eirawngbawl tih tlem te, boruak thianghlim a awm theih nana ram ngaw humhalh kawng a hmanraw țangkai a nih tur thu leh mei khu avanga hriselna a nghawng chhiat țhin te sutkian nana he Scheme hi duan a nih thu a sawi a. Ti riral mai mai lo turin leh scheme in a duh ang tak a țangkai tak a hmang turin kalkhawmte a chah a ni.

Pu Reuben K.Lalngaihzuala, Manager, MIZOFED LPG, Kolasib chuan report pein Kolasib khaw chhunga chhungkaw 89 ah tukin hian PMUY hnuai a hmațhatna dawng an awm thu leh chhungkaw 200 bawr vel dawng tur a ruahman leh mek a nih thu a sawi a. PMUY hnuai a hmațhatna dawng hi Kolasib khaw chhung leh pawnah chhungkaw 900 vel an awm tawh thu a sawi bawk a ni.