No.502/2020-2021

Mamit Bialtu MLA Er H. Lalzirliana, Vice Chairman, Road & Infrashtructure Develoment Board chuan a bial chhung khaw hrang hrangah tanpuina sem chhunzawm zel.

Bialtu MLA hian tunlaia Coronavirus ( Covid - 19) hrileng mek avangin Sawrkar-in inkharkhip a kalpui mek a. Heng avang hian chhungtinte’n kan eizawnna lam kan hawi theiloh avangin bial chhung khaw hrang hranga, chhungkaw thenkhatte’n ei leh barah harsatna kan tawhna chhawmdawlin, Village Level Task Force kaltlangin tanpuina thahnem tak a lo pe chhuak tawh a. Ei leh bara chhawmdawl bakah hian VLTF duty-te’n a tul ang anga an hman tur Facemask, Hand Sanitizer, Hand Clove leh sumfaiin tanpuina a lo hlan tawh bawk a ni.

Bialtu MLA hian ni 21-22 April, 2020 chhung khan bialchhung khaw hrang hrang khaw 28 fangkual lehin tanpuina, Alu Bag 30, Dal 26 bag, Purun Bag 22 leh Cooking Oil Gas case 30 bakah Face mask leh VLTF- te hnenah tanpuina pawisa a hlan leh a ni.

Pu Zira chuan kan ram Covid - 19 hrileng laka kan him theihna turin Mizoram Sawrkar chuan theihtawpin hma ala zel a, Kan Chief Minister zahawm tak hmalakna leh Mizoram Sawrkar Officials hrang hrangte bakah mipuite thawhhona a zarah kan ram chuan chanchin lawmawm tak kan la nei zel a, he hri lakah hian Pathian tanpuina nen kan him zel a beisei thu a sawi. Covid - 19 hri vei Mizoramin kan neih chhun bakah kan mizopui rampawna hri vei enkawl, chhawmdawl leh vilzui kawngah leh Medical Team-te inralrinna atana an hmalakna hrang hrangah Health Minister thawhrimna chu fakawm a tih thu a sawi bawk.

Bialtu MLA chuan inkharkhipna kan kalpui mek avangin ramdang atanga kan chawkluh thin ei leh bar thil hrang hrangah duhthusamin kan hnianghnar thei lova, chutihrual chuan kan ram chhunga kuthnathawktute thawhchhuah ang angte khawtin VLTF kaltlangin mipuite lei theih turin chhawpchhuah zel a ni chu a lawmawmin kuthnathawktute hlutna a lang chiang hle a ni tiin, Tuna kan dinhmun en hian helam kawnga tan kan lak nasat a tul zia leh kan ram leilung hmang tangkaia, thlai thar chhuah lamah tan la sauh sauh turin kuthnathawktute a chah a. Bialtu MLA chuan Covid - 19 avanga kuthnathawktute te’n kan thlai tharchhuah lamah harsatna kan tawh lohna turin Mizoram Sawrkar leh Horticulture Department-te  chuan ruahmanna tha tak leh rang taka siamin, tunah hian kan District khaw hrang hranga Loneitu/Huan siamte tan thlaichi tha semchhuah mek a ni chu bial mipui aiawhin Mizoram Sawrkar chungah lawmthu a sawi bawk a ni.

Er H. Lalzirliana, Bialtu MLA hian a bialchhung khua a fanna-ah hian tun hnaia thli leh ruah thawkin in leh lo a tihchhiat sakte tan chhawmdawlna pawisa leh Silpouline a pe nghal bawk a ni.

Heng khaw hrang hrang-a VLFT te hian hun harsa leh khirh an tawh lai pawh tha thlah miahlo a, tanpuina hna thawhsaktu leh thlamuan rengtu Bialtu MLA an nei chu thlamuanthlak an tiin lawmthu an sawi a ni.