Vawiin khan Mamit Bialtu MLA Er.H.Lalzirliana chuan Mamit Chhimveng Branch YMA -te'n YMA Day an hmanna Chhimveng YMA Hall-ah khuallian niin a hmanpui a. Chhimveng Branch YMA hian an khuallian an Branch Member Er.H.Lalzirliana chu MLA anih lawmpuina an hlan bawk.

Khuallian chuan YMA Member-te fuihna thu sawiin Mizo kan nih angin nu leh pa zahthiam te, aia upate zahthiam chu kan culture a ni a. Kan chhawmnung zel tur a ni a ti.

Mizo hnam chu Tribal kan nih angin Tribal kan nihna chu kan hman tangkai thiam a pawimawh hle a ni a ti. 

Mamit chu Mizorama khawfai pawl kan ni thei a, nasa lehzuala faina kawnga hmalatu ni theuh turin YMA Members-te a chah a. Mizo takin kan changkang thei a, kan Mizo-na vawng rengin changkan lam i pan ang u a ti.

YMA Day denchhen hian High School II Mamit zirlaite hman turin khuallian hian Computer Set 5 a hlan bawk.

Chhimveng YMA Hall-a YMA Day lawmna Programme hi Pu Z. Lalhmahruaia, President, Chhimveng Branch YMA chuan a kaihruai a. Bialtu MLA hian zanin hian Lengpui khua-ah YMA Day lawmna a hmanpui leh ang.