Prime Minister Narendra Modi kaihhruai NITI Aayog Governing Council meeting ah hian agenda pali sawiho niin chungte chu - ruahtui khawl (rain water harvesting) chungchang te, khawkheng chungchang leh hmalak ngaihna te; aspirational district chungchang te; agriculture sector siamthat dan leh security chungchang te a ni a.

Mizoram Chief Minister chuan Mizoram leilung that zia leh thlai engkim that duhna a nih avangin hmasawnna chak taka kalpui tura thawh a pawimawh zia a sawi a; rua leh mau ringawt pawh transportation system tha leh link road  chhawrnahawm ruahman a nih chuan Mizoram mai nilo India hmarchhak pumpui hmel tidanglam thei tura hma lak a theih ngei a rin thu a sawi. Hemi kawnga hmalak dan tur chungchang, a bik takin Prime Minister leh Union Finance Minister a la sawipui tur thu a sawi bawk. Kumin meeting agenda hnuaia Mizorama hmalakna awm hrang hrangte sawi bawkin Chief Minister chuan Mizoramin rainwater harvesting a kalpui dan leh hmasawn zel dan tur te, kumin a ruahtui hmuh a tlem avanga thlai chin hun a tihbuai thu leh thildang harsatna Mizoram in a tawh dan te a sawi a; Aspirational District Mamit atana hmalakna tur te; agricultural transformation nei tura Mizoram bik atana ruahmanna siam a pawimawh thu te, Mizoram chu ram ralmuang tak a nih reng theih avanga entawn tur tha tak a awm thu te sawiin, External Aided Project approval process thui lutuk siamthat a ngaih thu te, North Eastern Council sum tam zawka thuam a tul thu te, Mizoram Bamboo Development chu mission mode a thawh a tul thu te, Act East policy kalpui tura NE States pawimawhna te, Infrastructure development atana sum tam zawk Mizoram tan ruahman a duh thu te a thlen bawk.

Prime Minister Pu Narendra Modi chuan India ram chu kum 2024 ah 5 trillion dollar economy ah siam hman tum a nih thu leh chumi atan chuan state tinte tanrual a pawimawh thu a sawi a. Ram pawn a thil thawnchhuah leh employment lama tan lak tul a tih thu sawi bawkin, state ten hemi hawi zawng hian hma la hlawm se a ti a ni. Union Home Minister Pu Amit Shah chuan Chief Minister te hi security lam dinhmun tlangpui a sawipui a, Union Finance Minister Pi Nirmala Sitaraman pawhin 14th Finance Commission atanga State te kuta sum tam zawk dah a nih thu a tarlang bawk.

NITI Aayog Governing Council meeting hi Prime Minister bakah Cabinet Minister te, Chief Minister te leh Union Territory a Lt. Governor te an tel kim hle a ni.

Chief Minister hi Planning Secretary Dr. C.Vanlalramsanga leh Dr. Peter Malsawmtluanga, Addl. PS to CM ten an tawiawm a ni.