Tualbung Branch YMA chuan 84th YMA Day lawmna Community Hall-ah neiin, P&E Minister Pu R.Lalzirliana chu khuallian a ni.

Khuallian Pu R.Lalzirliana chuan YMA leh NGO member dang lokal bakah naupangte hnenah lawmthu a sawi a. Tualbung  Branch YMA ten YMA Day lawmna ropui tak an buatsaih chu lawmawm, a ti a. Tualbung chu khawtlang inlungrual niturin leh pi pu sulhlu hrang hrang vawng nung turin duhsakna a hlan a. Tualbung khua leh tui te chu rambuai hma pawha khaw taima leh intodelh em em thin an ni a, mite neih ringlo a, midangte tanpuitu leh Mizorama vaihlo tuina ber khua ni thin a ni, a ti a. Tualbung YMA member te chu mite tana hnawksaklo ni turin leh kut dawhtu nih aiin midangte tana penchhuaktu ni turin a ngen bawk a ni. Minister Pu R.Lalzirliana chuan YMA nula leh tlangval te hian kan pi pu nunmawi tak, tlawmngaihna leh aia upa zahna te chhawmnung zel ila, lo parvul nawn leh sela, chutiang keng kawh apiang branch chu an dinchang reng thin a ni, a ti a. Kan hnam nun hi YMA hian a veng nasa em em a, ruihhlo do kawngah te hlawh neilo in, hah takin, engtik lai pawha bei tu te an ni, tiin a sawi a ni. 

Khuallian Pu R. Lalzirliana chuan Tualbung khua atanga Chhim lam, Km 2 vela hla, rambuai hmaa Tualbung khaw hluiah YMA Day pualin Rihnim leh Bung thing a phun a. Kum 1967-a volunteer leh India sipaite inkahna hmun tlawhin, Mizo History pawimawh a nih avangin, helai hmun hi awmze nei taka chei that a ni ang, tih a sawi bawk a ni.

He hun hi Pu F.Lalnunthara, President, Tualbung Branch YMA chuan a kaihruai a, NGO hrang hrang MHIP, MUP leh VC ten Tualbung Branch YMA hnenah lawmpuina leh duhsakna lantir nan thilpek an pe a. Khuallian Pu R.Lalzirliana hi Tualbung Primary School, Middle School, High School leh RV English Medium School ten  MLA Term 5, Cabinet Term 3 a nih lawmpuina Citation an hlan bawk a ni.

Minister Pu R.Lalzirliana hi Pu Vanlalsawma, SDO (Civil), Tualbung Welfare Committee, Aizawl leh midangte'n an tawiawm a ni.

Tualbung hi In 200 vel niin, YMA member 339 an awm a ni. Kum 2021 ah Tualbung khua Kum 100 tlin lawm tum a ni.