Kar hmasa June 12 - 14 chhung khan Pu C. Lianlunga, Engineer-in-Chief, Power & Electricity chuan Khawchhak lama P&E hnathawh mek leh Office-te endikin a tlawh kual a. June 12, 2019 khan Kawlbema MW 4 pe chhuak tur Small Hydel Project tlawhin he Project a civil works leh evacuation line hna hi zawh thawkhat a ni tawh a, electric khawl hi kumin October thlaah contractor hian a supply tan ang a, March 2020-ah commission theih beisei a ni.

June 13, 2019 khan E-in-C hian Champhai tlawh lehin Champhaia S.E. Office te fangin heta hnathawkte hi staff meeting a neih pui a. Hemi ni vek hian Khawbung thlanga 5 MW pe chhuak tur SHP endik turin site-ah a riak lut a. A tuk June 14-ah project inspection uluk taka neiin contractor leh a hote meeting a neih pui a. He project hi kumin August thlaa Commission theih ngei turin contractor chu a hrilh a ni.

Heng Small Hydel Project-te hi fur ruahtui tam laia hman theih tur chauh ni mah se Mizoramin power a mamawh engemawchen mahni inphuhrukna a nih dawn avangin P&E Department hian tha tak leh a hun taka zawh fel an nih theih nan nasa takin hma a la mek a ni.