Vawiin chawhma khan Department of Information & Public Relations Director Pi Lallianpuii chuan Mizoram Journalist Association (MJA) hruaitute leh ex-officio member te kawmin, thingpui in hona hun a neih pui.

I&PR Director Pi Lallianpuii chuan MJA leh I&PR Department thawhho tawhna zawng zawngah Department aiawhin lawmthu a sawi a. Intawiawma, infinchhuah zel turin MJA te chu a sawm bawk a ni. Pi Lallianpuii chuan MJA te chu sawrkar thiltih leh hmalaknate mipuite hriata pholang tu leh puangzar tu an nih angin, dinhmun pawimawh tak an chelh a ni, a ti a. Sawrkar chuan Media te hamthatna a ngai pawimawh a, Department hotute pawhin a tul angin hma an lakpui zel ang, a ti bawk a ni.

Inkawmho naah hian MJA President Pu Zonunsanga pawhin thu sawiin, Director Pi Lallianpuii hnenah service tluang taka nei turin duhsakna leh lawmpuina a hlan a, Mizoram Journalist Contributory Retirement Scheme leh Advertisement Rate te pawh beiseina sang tak nen an thlir thu a sawi bawk a ni.

Inkawmho naah hian MJA te bakah, I&PR Officers te an tel a ni.