Vawiin khan Er. H. Lalzirliana, Mamit bialtu MLA chuan Lengpui Joint MHIP-te'n MHIP Day lawmna hun an buatsaih chu khuallian niin a hmanpui.

Mamit bialtu MLA chuan thu sawiin Mizote'n pawl ropui tak tak kan nei hi kan vannei hle a, Lengpui Joint MHIP-te chu kan culture  vawnghim tlat tur leh kan hnam boral mai tur venghima theihtawpchhuah zel turin a chah. Lengpui khaw chhunga pawl hrang hrangte'n an kalkhawm nikhuaa mi harsate puala thawhlawm an khawn thin chu entawntlak a tih thu sawiin khawdang pawhin hetiang hi ching ve se a duh thu a sawi. 

Mizo hmeichhiate chu mi kawlhrawng tak, tawng thiam hauh lo pawha foreign thleng thleng Calculator hmang ringawt pawha sumdawng thei, Mizoram-ah leh khawi hmunah pawh eizawngtu, sumdawng, dawrkai, Office thlengin chhungkaw khaidingtu an nih tak fur thu sawiin Mizo mipate'n kan tluk lo takzet a ni a ti. MHIP Members-te chu Mother Teresa nun entawn tura chahin Pathian tihna nen inchhungkhur enkawl turin a chah.

Er. H. Lalzirliana chuan Sports Minister hmalaknain Mamit bialte tan hmasawnna a awm dawn thu sawiin Lengpui tan Artificial Turf phah tura tihfel tawh a nih thu a sawi a. Lengpui Joint MHIP-te chu Day lawmpuina pawisa pein Lengpui Model veng MHIP in sakna tur pek an nih tur thu a sawi bawk.

He hunah hian Lengpui Joint MHIP-te hian an members chatuan ram panta mi 9-te sunna hun an hmang nghal a ni.