Sawrkar hotulute leh MZP inkawmnaah hian Meeting kaihruaitu I&PR Minister Pu Lalruatkima chuan zirna, hmasawnna leh hnam thilah Chief Minister Pu Zoramthanga kaihhruai sawrkar chu Mizo mipuite tana tha ber tur ang zelin a kal dawn tih a sawi a. Tukina neih tak, Council of Minister Meeting ah pawh thutlukna pawimawh tak tak siam a nih thu te a sawi a. The Mizoram (Selection of Candidates for Higher Technical Courses), Rules, 2016 chungchang pawh ngun taka ngaihtuah a nih thu te tun dinhmun a thlen chin te a sawi a. Hun a tep ter tawh avang leh zirlaite an khawtlai lohna tur Council of Minister chuan a ngaihtuah a. He Rules hnuaia Mizoram Quota -Category-I a dil theite, 'Indigenous People' tiha inziak chu tukina Council of Minister thukhawm chuan 'Zo Ethnic' bak Mizoramah 'Indigenous People' an awm loh avangin Zo Ethnic te pual atan a dah tih a sawi a. Ramri buai chinfel kawnga hmalakna kal chho mekah pawh Mizo mipuiten kan pawm tlan, Bengal Eastern Frontier Regulations, 1873(Regulation 1 of 1873) Section 2 tlawhchhana siam Cachar Inner Line, 1875 chu tan chhan atana hman tur leh sawrkar dinna a ni tiin Council of Minister thukhawm chuan thutlukna a siam a. Tin, July 2 a Durtlang Veng chhunga Basic Service to Urban Poor (BSUP) hnuaia insak chim chhui chianna pawh Aizawl Bawrhsap kaihruaiin Magisterial Inquiry din a chhui chian tur a tih a ni a ti.
School Education Minister Pu Lalchhandama Ralte pawhin Education Department hnuaia hnathawk lak tur chungchangte sawichhuakin hnaruak hnawhkhah tur hmuna awm thei tur te chauh, induhsakna tel miah lovin lak a ni dawn tih a sawi a. School Education hnuaia hnalakte chu Right to Information Act hmang pawha chhui chian dawl a ni dawn a ni a ti. Durtlanga BSUP In atanga Edenthar leh Rangvamuala sawnchhuah mek chhungkaw zingahte zirlai engmaw zah an awm chu pawi a tih thu a sawi a. Heng zirlaite hian School Admission-ah harsatna an tawh loh nan sawrkarin ruahmanna a siam a. MZP hruaitute pawh heng zirlaite school insawnah harsatna an tawh loh nan enchianpui turin a sawm nghal a ni.
Law & Judicial Minister Pu T.J Lalnuntluanga chuan hmasawnna leh hnam thila hmalaknaah fimkhur taka kal a tul thu te, sawrkar anga thil tih ngai te leh mipuiten sawrkar an thlawp tlat a, tanrual a pawimawh thu a sawi bawk a ni.
Minister te leh MZP inkawmnaah hian MZP President L. Ramdinliana leh B. Vanlaltana, Vice President te pawhin thusawina hun neiin Council of Minister thutlukna pawimawh tak tak avanga an lawmthu te an sawi a. Boruak tha tak hnuaiah inpawh tlang takin sawihona neih a ni a. Sawrkar anga tih theih chin te pawh tlang taka sawi a ni.
