Vawiin khan Information & Public Relations Director Pi Lallianpuii hovin ama pisaah I&PR official-te leh Mizorama electronic media 3 - DDK, LPS Vision leh ZoNET Cable TV - aiawhte nen hmalak zel dan tur leh electronic media hmasawnna turte an sawiho.

I&PR Director Pi Lallianpuii chuan I&PR Department leh electronic media te inkarah thawhhona tha tak awm thei zel chu a lawmawm takzet a ni a ti a. Tunlai khawvel media thang chak lutuknaah hian sorkar thu puangchhuaktu department an nihna angin I&PR pawh nasa takin tan a la chho ve zel a, print leh electronic media ten theihtawpin an thlawp thin avangin lawmthu a sawi. Pi Lallianpuii chuan TV hi chhungkaw tinah puitling leh naupang zawng zawngte pawhin an thlir thin a nih avangin film, serial  leh programme hrang hrang an chhuah thinte chu nasa leh zuala thlan uluk a tul zia sawiin a bik takin foreign serial Mizo tawnga lehlinah tawngkam duhtui tawk lohna a tam thin chu fimkhur leh zual turin a chah. Media-te hi ram leh hnam, khawtlang leh mimal te tan a ‘ral vengtu’ (moral guardian) an nihna hre reng chunga hmasawn zel turin duhsakna a hlan.

Vawiin meeting-ah hian I&PR leh electronic media kaltlanga Assembly Session live-a tihchhuah te, VIP/VVIP coverage te, sorkar hun/ni pawimawh coverage te, TV kaltlanga sorkar hmalakna leh hlawhtlinna hrang hrangte mipuite hnenah puanzarna kawnga tanlakna turte, Cable TV Monitoring Committe chak zawka kalpui dan tur te leh TV-a programme hrang hrang tihchhuahte chu uluk leh fimkhur a pawimawh thute an sawi a ni.