Vawiin khan Archives Hall, Babutlang-ah Art & Culture Minister Pu R. Lalzirliana'n sawrkar document pawimawh, kan ram leh hnam rohlu thuziak te Computer hmanga tha taka dahthatna tur “Digitization of  Archives” a hawng.

Art & Culture Minister chuan he hunah hian thu sawiin digitization of archives chu hmalam pana ke kan penna kawnga thilpawimawh tak a ni a, Art & Culture department chauh ni lovin, sawrkar department hrang hrangte tana kawng sat kawtu ni se a duh thu a sawi a, khawvel ram changkang hmasa te chu sawiloh kan thenawm state Assam pawhin an sawrkar record mai bakah mimalin an kawl record te pawh an State archives-ah dahkhawmin an digitize vek tawh a. State Archives dang engemawzatin an record te digitize in hma chak takin an la chho mek bawk a, hetih ruala keini pawhin kan tihlawhtling chho thei hi a lawmawm takzet a ni a ti.

Pu R. Lalzirliana chuan  Mizote hian record vawn that leh ngaihpawimawh nachang kan la hre tawklo hle a, heng avang hian tul lovah kan buaiin keimahni thil ngei ngei pawh kan chahn phah fo a, tunlaia buaina kan tawh tam tak pawh hi record kan vawn that tawkloh vangah a ngaih theih niin a lang a ti a. Dan ang taka neitu nihna lehkha te hi a pawimawh em em a, kan dahthat lohva kan vawnthat loh chuan kan ta ngei ni a kan hriat pawh hi miin min chhuhsak thei ani tih hriat a pawimawh a ni  a ti a. Record mumal tak kan neih loh avangin kan thenawm ram ten en pawh kan intibuai fo a, thil tul lovah sum leh pai, hun leh tha tam tak kan seng ral thin a, chuvangin hetiang harsatnate pumpelh anih theih nan leh kan lo tihsual palh emaw a lo awm a kan inzirna atana kan hman turin record i vawng tha ang u a ti a ni.

Mizoram State Archives hi Education department hnuaia State Museum-ah kum 1979 atangin bultan a ni a, October ni 1, 1985 khan Museum atangin a indang veleh a, dawrpui Vengah leh Upper Khatla ah te mimal inluahin an awm kual hnu ah Mizoram sawrkarin an office hmun tur a leisak tuna an awmna Babutlangah hian May ni 26, 1998 khan an insawn a ni.

Mizoram State archives hian hmun hrang hrang atangin record/document te an lakhawm a, tunah hian department 21 atanga file pawimawh lakkhawm an vawng tha mek a, a tlangpuiin hengte hi British ho hunlai leh district Council hunlai ami a ni a, Union terotory kan nih hnu lama file pawimawh vawnthat tur hi sawrkar department lam atangin an dawng mang rih lo a ni.

Mizoram sawrkar chuan document leh record vawn that a pawimawh zia hria in Mizoram Public Records Act 2011 leh, Mizoram Public Records Rules 2014, a lo buatsaih tawh a, hemi bawhzuia a tul anga hma la turi9n Art& Culture Department a ruat a, Mizoram sawrkar hnuaia Department, Autonomous Body, Municipal Council, Corporation bakah Sawrkarin a din Committee reng reng chu te chu he dan hian a phuar tlat bakah an record te chu Mizoram State Archives ah vawn that reng tawh tura thehluh ngei ngei tur a ni a, he Dan zawm lote chu dan anga hrem theih an ni.

Mizoram State Archives hotute chuan tuin dinhmunah School Education department leh Mizoram KVI Board atang document tlem azawng Archive a dah tura an dawn thu an sawi a, Drpartment dangte pawh Archive a dahthat tur document leh records pawimawh te thawn tura an ngen thu leh hei hi ngaipawimawh tura an duh thu an sawi a, Digitization an tih hnu hian record hlui leh han khawih chet zawnga chhe mai thei tawh te vawn that a a duh apiang ten an en theih turin him takin an enkawl thei dawn a, a rualin mi engemawzatin record thuhmun an en thei dawn a, foreign leh state hrang hrang bakah Mizoram chhung ami te pawh State Archives tlawhtuten an document mamawhte soft copy in awlsam takin an lachhuak thei dawn a ni. Mizoram State Archives a record awm zawng zawngte digitization hna thawhzawh anih hunah chuan Scholars ten online a an record mamawh te an neih theih nan website changtlung tak siam tum a ni a, Audio & Visual Archives changtlung tak buatsaih turin ruahmanna an siam mek bawk a ni.

Digitization of archives hi Mizoram sawrkarin Rs. 38,33,000/- a pek atanga siam a ni a, Archives Hall building chhawng thumnaah Digitization Room hi siam niin, khawvel hmasawnna in a ken tel khawl tha zawk hmanga thla la-in computer-ah dah luh a ni a, kalphung fel leh mumal zawk leh mamawh hun pawha awlsam zawka haichhuah anih theih nan digitization hi kalpui a ni a, kum thum chhunga digitization hna hi thawh zawh hman tura ruahman a ni.