1993/2023-2024

Mamit 22nd September, 2023 : H.Thanzauva Memorial Mamit District Inter Village Football Tournament chu nizan khan Chhimveng YMA Hall, Mamit-ah Er. H. Lalzirliana, Mamit Bialtu MLA leh Vice Chairman, Roads & Infrustructure Development Board ni bawk chuan a pet hawng.

Er. H. Lalzirliana chuan Mamit District chhunga infiam mite hmakhua ngaih avanga Football Tournament buatsaih a nih thu a sawi a, he tournament hlawhtlin theih nana tha thawhtu/tanpuina/sponsorship petute zawng zawng chungah lawmthu a sawi. Mamit District chu infiamna, zirna leh Infrustructure-ah hriat kan la hlawh tawklo hle a, hmasawnna tur tam tak kan la nei a ni a ti. Kan Sawrkarin thalai infiam mite hmakhua ngaiin a vei hle a, District chhungah infiamna lama hma kan sawn theihna turin hma nasa takin a la mup mup a, Sports Minister pawh a phur hle a, kan District chhunga hma a lakna te a tarlang, Sport infrustructure nei tha ber District kan la nih thuai a beisei thu a sawi.

Bialtu MLA chuan mizo thalaite hian tihtakzetna kan mamawh hle a, chumi tello chuan hlawhtlinna a awm theilo a ni a ti. Ram tana hna a thawhna kawngah tih tak zeta a beihna chu malsawmna a dawnna a nih thu sawiin, Mamit Bial mipui tan theihtawpchhuah chu a tum leh intiamna a nih angin tan a lak zel dawn thu a sawi a, thalaite chu thluak hman hun leh thinlung hman hun hria-a ngaihtuahna puitling tak nei tura chahin, Inter Village Football Tournament chu hlawhtling taka buatsaih a nih theihna tura theihtawpchhuah turin thalai infiammi kalkhawmte chu a chah a ni.

H.Thanzauva Memorial Mamit District Inter Village Football Tournament 2023 Kick off hi Pu Lairokhuma, President MDFA & Chairman Organising Committee chuan a kaihruai a, Pu H.Lalchhandama, Treasurer MDFA, Pu H. Lalthlengliana, Treasurer, All Mizoram VC Association te'n Tournament buatsaih a nih theih nana Bialtu MLA Er.H.Lalzirliana hmalakna-ah lawmthu an sawi bawk.

Mamit District Inter Village Football Tournament-ah hian VC team 24 tel tur inziak lutin, Ni 25th September ah tan a ni dawn a. Ni 6th October, 2023-ah Final Match khelh tum a ni. Champion Team hian Rs 1,10,000/- (nuaikhat singkhat), Trophy leh Medal an dawng ang a, 2nd Runner Up hian Rs. 55,000/- (singnga sangnga) bakah Trophy leh Medal an dawng bawk ang. VC team tel zawng zawngte hi Rs 5,000/- (sangnga) hlan vek an ni bawk a ni.