3346/2022-2023

Aizawl 24th January 2023: Social Welfare and Tribal Affairs Minister Er.Lalrinawma chuan National Girl Child Day kharna inkhawm Tourist Lodge, Chaltlanga neih chu khuallian niin a hmanpui.

Khuallian Er. Lalrinawma chuan thu sawiin Mizo nunphungah hmeichhiate dinhmun pawimawhzia a sawi a. Chhungkaw hrang hrangah te, khawtlang leh veng tinah Hmeichhiate mawhphurna hi a sang hle a ni, a ti. Hmeichhia te chu tuna an thlen chinah duhtawk mai loa theitawp chhuah zel turin a fuih a, Sawrkar Laipui leh Mizoram Sawrkar pawhin hmeichhia te chanvo humhim leh vawn dik hi a ngaipawimawh thin hle a ni, a ti bawk. National Girl Child Day hian rahtha chhuah se, mahni nihna leh awmhmunah theuh rahbi thar min rahtirtu ni ngei se, hmeichhe naupang dikna leh chanvo vawnhimsaka, khawvel hmaah hmeichhia te hian kan hnam min chawimawi thei a ni tiin Minister chuan 'hmeichhia te ni' pualin kal khawmte a fuih a ni.

Khuallian hian National Girl Child Day pualin zirlai naupang te tana lemziaka inelna Primary, Middle, High School & Higher Secondary hrang hrang te tana buatsaiha ti thate hnenah lawmman a sem nghal a ni.

Pu K.T.Beichho, IR&AS, Principal Secretary SW&TA pawhin he hunah hian thu a sawi a ni.

Pi Lalrammawii Kawilam Asst. Director, WCD chuan District hrang hranga Girl Child Day hmandan report a pe a. Pi Lallianpuii Director WCD in lawmthu sawina hun neiin hun hnung a khar a ni.

Programme hi State Hub for Empowerment of Women, Aizawl District Hub for Empowerment of women, Women and Child Development, SW &TA Department, Government of Mizoram buatsaih a ni.