694/2023-2024

Dated Serchhip, the 6th June, 2023: Vawiin khan Er. Lalrinawma, Minister, AH & Vety, Sericulture, Excise & Narcotics, etc., chuan a bial chhung khua Chhiahtlang Venghlunah Health Clinic Centre thar a hawng a, chawhnu lamah Chhiahtlang Higher Secondary School-a zirlai hlawhtlingte lawmpuina hunah khuallian niin a hmanpui bawk.

Health Clinic Centre hawnnaah hian Minister chuan, eizawnna, hriselna leh zirna te chuan a rilru a kap lian ber reng a, hmalakna pawh an kalpui tam tih sawiin, a bial chhunga mipui zaa sawmsarih panga vel ten nitin hnathawka an Lo lam an pan thin avangin a lo nawmsak zual nan an feh kawng kan lai nasa hle a, MLA Fund kan hman nasat berna pakhat a ni, a ti. Tin, hriselna lamah hma kan sawn theih nan hma pawh kan la nasa a, kan Sub Centre zawng zawngte Health & Wellness Centre ah kan hlangkai vek tawh a, Health & Wellness Officer ten an thutchilh nghal veka, an fel hlawm em em a, hripui dona kawngah pawh an thawhhlawm hlawm hle. Kan thlamuanpui thin hle a ni. Clinic Centre pawh hmun engemawzatah kan hawng tawh a, an tangkai em em vek mai a ni. Vawiina kan hawn clinic pawh hi Chhiahtlang North mipuiten tangkai taka in hman kan beisei a mamawh in neih ang ang pawh a theih ang angin kan ngaihtuah dawn a ni. Hetiang hmunhma tha kan neih theih nana Chhiahtlang North Village Council te inpekna hi a entawn tlak hle a, an chungah lawmthu ka sawi a ni, a ti.

He hunah hian Dr. Lallawmkimi Chhakchhuak, Serchhip District Immunization Officer chuan Health Clinic hnathawh dan tlangpui a sawi a, Clinic te hi Sub Centre anga ngaih an ni lova, Sub Centre hnuaia Service kan pekte a pek ve vek theih nain Sub Centre hnuaia hnathawk an ni, hei vang hian anmahni pualin damdawi leh hmanraw mamawhte supply a ni lova, Sub Centre note an ni, a ti. Vawiina hawn Chhiahtlang North Health Clinic hi thawktu Health Worker pakhat leh Helper pakhat in an thutchilh ang a, an hnuaiah ASHA pathum an awm bawk ang.

He Centre building hi Chhiahtlang North VC ten NH 54 Compensation sum an dawn hmanga an sak a ni a. A buildingah hian Bazar, Chhiahtlang North VC House leh Health Clinic Centre te an awm dawn a ni.

Hemi hnu hian Minister hian Chhiahtlang Higher Secondary School-in an zirlai hlawhtlingte lawmpuina hun an School-a an buatsaihah khuallian niin hun a hmanpui leh a.

Minister hian thusawiin, Chhiahtlang Higher Secondary School in vawiin thlenga tluang taka a kal theih nana lo bei thintute chungah lawmthu a sawi a, zirlai hlawhtling tharte a lawmpui thu a hrilh a ni. School building thar an mamawhna sanzia a hriatpui thu sawiin a sakna tur sum hi a dap kual nasa tawh hle tih a tarlang a. Kan fund beisei te kan nghah mek lai hian a bul hi MLA Fund cheng nuai thumin lo tan phawt mai ila a tha ang, tiin MLA Fund chhuak hmasa ber atanga a building bul tanna tur a pek tur thu a sawi a ni. Kan ram hian mi rintlak tak a mamawh em em mai a, kan awmna hmun theuhvah, kan hnathawhna theuhvah, mawhphurhna kan chelhna tinah rintlak nih tum tlat ang u. Engemaw thil thalo a lo thlen hian a phenah mi rintlak lo an lo inphum chawk thin a, chutiang mi kan tam chuan ram leh khawtlang hian hmasawnna a hmuh tur ang a hmu phak lo thin a ni, tiin naupangte chu mi rintlak nih tum tlat turin a chah a ni. Intihsiakna hi a nasain a sang tawh lutuka, mi taimate tan lo chuan zirna lamah pawh hlawhtlin a har tawh a, amaherawh chu taima tan erawh chuan zau takin kawng a inhawng a ni, tiin taima taka zir chhunzawm zel turin a fuih a ni.

Pass lawmna inkhawm hi Pu  C. Lalrawna, Chairman, School Managing Board in a kaihruai a, Pi Lalawmpuii Ralte, Principal chuan an school report a pe a; school hi 2014 kuma din a ni a, 2017 ah Provisional pek niin kum 2018 ah Lumpsum Aided ah hlankai an ni. Sawrkar atanga tanpuina an dawn baka an sum mamawh hi Chhiahtlang mipuiten an thawhkhawm thin a ni. Kumin MBSE Exam ah khan Class 12  zirlai naupang 20 ten exam an hmachhawn a, an vaiin an pass a, an zinga pakhat hi Distinction a ni a, first division paruk an awm bawk. An din tirh kum, 2014 a zirlai naupang pakhat a fail tih loh chu kumin thlengin kumtin HSSLC ah hian zirlai naupangte an pass vek zel a, an din tirh kuma fail naupang pawh hi a kumleh lama tha taka a pass zui avangin he School in HSSLC zirlai naupang an neih zawng zawng naupang 166 te hi an la pass kim vek a ni.

Attachment

  • Loading attachment...