693/2023-2024

Champhai, the 6th June, 2023: District Jail leh inkhunghranna Home hrang hranga awmte'n hriselna tha an neih theih nan leh, hri inkaichhawn theihte laka inven nana heng hmuna awmte dinhmun enfiah kawnga beihpui thlakna, 'Integrated STI, HIV, TB and Hepatitis (ISHTH) Campaign' Champhai District chhunga kalpui tur chungchang zirhona leh inrawnkhawmna orientation meeting chu vawiin chawhnu dar 1:00 khan District Bawrhsap Pu James Lalrinchhana hovin DC Conference Hall-ah buatsaih a ni.

District Bawrhsap Pu James Lalrinchhana chuan a bika inkhungkhawmna Jail leh Home hrang hrangahte natna inkaichhawn a awlsam bik thu leh hluar thin thu sawiin, Sawrkarin heng hmuna awmte hriselna mai bakah pawn lam thlenga nghawng a neih theihte venhim a ngaipawimawh em em a, hemi chungchang bawhzui nan hian June thla chhungin Integrated STI, HIV, TB and Hepatitis (ISHTH) Campaign kalpui tum a ni, a ti a. Campaign hlawhtling tak neih a nih theih nan thawhhona tha tak hnuaiah hmalak tlan a tul dawn thu sawiin, ngaihdante sawia inrawnkhawmna zau tak neih a pawimawh dawn hle a ni, a ti a. Jail leh Home a awmte hriselna ngaihpawimawh a tul thu sawiin, dinhmun khirh taka ding an nih avangin hmangaihna leh inpekna thinlung pu chunga rawngbawl a tul thu a sawi a. ISHTH Campaign kalpui tur chuan hriselna mai bakah thiamna leh finna a pek dawn avangin rah tha a chhuah ngei a beisei thu a sawi bawk.

Thukhawm chuan Integrated STI, HIV, TB and Hepatitis (ISHTH) Campaign khuhhawnna chu District Bawrhsap hovin June ni 12, 2023 chawhma dar 11:00 hian District Jail Champhaiah neih ni se tih a ni a. Hemi hnu hian campaign neih chhunzawm nghal tur a ni a; campaign program kimchang duangtu tur Sub-committee din nghal a ni a. Ruahman dan chuan Champhai khawpui chhunga District Jail bakah Home hrang hrang leh inenkawlna hmun thlan chhuah 11 ahte ISHTH Campaign hi kalpui tum a ni a, hriselna kawnga thiam bikna nei ten hriselnate endikin test tul angte leh councelling-te pawh an nei dawn a. Damdawi hmanga enkawl tul angte pawh buaipui tum niin, inzirtirna hunte hman zel tum a ni bawk.

Integrated STI, HIV, TB and Hepatitis (ISHTH) Campaign hi a tum khatna tur a ni a. Meeting-ah hian Line Department hrang hrang inkara thawhhona tha vawnnun a pawimawh thute tarlan niin, Line Department leh Home atangtein report ngaihthlak a nih bakah campaign chungchanga ngaihdante ngaihthlak a ni bawk a. Hriselna enfiah dan tur leh daily report pek kawnga pawimawhte sawiho a ni bawk.