692/2023-2024

Lunglei the 6th June, 2023 – Lunglei High Powered Committee (HPC) kaltlanga Lunglei khawpui chhunga UD&PA leh Lunglei Police hnathawh kal mekte chu vawiin khan HPC Vice Chairman Pu Lawmawma Tochhawng hovin a hmunah enfiah an ni.

UD&PA hnuaiah hian HPC kaltlangin Lunglei khawpui chhunga retaining wall rawng hnawih, side drain siam leh repair hna, footpath siam that leh footpath railing siam leh repair hna te thawk leh tura ruahmanna siam fel a ni tawh a. Nikum sawrkar kum 2022-23 chhung khan heng hna hrang hrang atan hian HPC sum cheng nuai 66.695 sen niin a chhunzawm zel nan kumin sawrkar kum 2023-24 hian cheng nuai 71 dah leh a ni a. Hemi sum hmang hian hna 24 hengte – retaining wall rawng hnawih hmun 13-ah, side drain siam hmun 2-ah, side drain bula PCC Pavement siam hmun 6-ah, footpath leh hand railing siam that hmun 2-ah leh Ramthar Sub Centre hnuaia chequered tile step siam hna te thawh leh tur an ni a.

Vawiin inspection-ah hian HPC Vice Chairman hi DUDO Lunglei Pu C. Sawihlira leh UD&PA hnuaia JE pahnih Pu T. Ramropuia leh Pu R. Lalnunsanga ten an tawiawm a. Lunglei khawpui chhunga nikum lama hnathawh tawh te leh kumina thawh tur ruahmanna siam te a hmunah uluk takin an enfiah a. Heng hna te hi Lunglei khawpui thang zel atan a pawimawh takzet thu sawiin Pu Lawmawma Tochawng chuan tha taka thawh ngei an nih theihnan UD&PA hotute chu uluk taka lo vil tur leh harsatna an neihte a hnenah thlen vat thin turin a chah a ni.

Vawiin vek khan Lunglei HPC Vice Chairman hian HPC sum cheng nuai 30 senga hnathawh Lunglei Police Station chei that hna a enfiah nghal a. Lunglei Additional SP Pu C. Lalfakmawia leh a thawhpuiten anlo dawngsawng a ni. Lunglei Police Station chei that hna hi Departmental a thawh niin ground floor leh 1st floor ah te renovation hna hrang hrang – floor tile phah, wiring siam that, bathroom sak that, ceiling siam that etc hna te thawh a ni a, July thla chhung hian thawh zawh hman an in beisei thu Police hotute hian anlo report a ni. HPC Vice Chairman chuan Lunglei Police te thawhrimna leh inpekna chu fakawm a tih thu sawiin hmunhma tha zawk an nei chuan an hnathawhnaah phurna thar a pek ngei pawh a beisei thu a sawi a. Lunglei Police Station renovation hna chu anih tur ang ngeia uluk leh tha taka anlo thawh avangin an chungah lawmthu a sawi bawk a ni.

Attachment

  • Loading attachment...