1078/2022-2023
Dated Serchhip, the 28th June, 2022: Vawiin khan Er. Lalrinawma, Dy. Speaker, Tuikum bialtu MLA chuan a bial chhung khua Darlawnga MLA Fund hmanga thawh khaw chhung lane kawng PCC Flooring leh khawtlangin Kuva an chinna hmun panna tur laih mekte a tlawh a, khawtlang hruaitute nen inkawmna hun an hmang bawk.

Inkawm honaah hian Er. Lalrinawma chuan, hriselna, eizawnna leh zirnate chu a ngaih pawimawh hmasak ber ber te an ni thu sawiin, a bial chhungah pawh heng thil pathumtea hmasawnna a awm theih nan theihtawp a chhuah ve thin tih a sawi a. A Bial chhunga khaw hrang hrangte inkalpawhna tur hna engemawzat thawh a ni tawh a, tun hnaiah Baktawng khua leh Ngentiangah Helipad kan siam belh bawk a, bial mipui te pawhin an hlut thiam hle. Hriselna lamah Health Clinic leh thawktute indaihlohnate pawh a theih ang angin hma kan la a, zirna school thuam that ngai kan thuam tha a, tun hnai maia result chhuak atangte pawhin zirlai Naupangten hlawhtlinna duhawm tak tak an hmu tih kan hria a ni. Heng hmalakna kan neih theih chhan leh hmasawn duhawm tak tak kan hmuh theihna chhan hi bial mipuiten min thawhpui that vang a ni tih a chiang hle bawk, tiin a bial chhunga hmasawnna tunhnaia thawhte a tarlang a. Kan tanrualna Pathianin mal a sawm a ni, a ti.

A bial mipuite khawngaihna leh duhsakna tam tak a dawn thin thuah lawmthu sawiin, Darlawng khawtlangin hmasawn zel tuma an beihna a faka, Kuva hmun zau tham tak buatsaih tuma an beih mekna pawh a hlawhtlin ngei a beisei thu leh a theih chin china a tanpui zel tur thu a hrilh a ni.

Dy. Speaker hian MLA LADS fund hmanga khawchhung inkalpawhna kawng PCC Flooring leh SEDP hnuaia Darlawng Kuhva chinna hmun Tuirini panna kawng laih mek a en nghal a ni.