3918/2022-2023

Dated Serchhip, the 21st March, 2023: Vawiin khan Pu Laltlanmawia Memorial Hockey Tournament hawnna Baktawng field a neih chu Er. Lalrinawma, bialtu MLA leh Minister ni bawk chuan a hmanpui a, hemi hnu hian Chhuanthar Tlangnuamah hmasawnna tur hnathawh hrang hrangte a hmunah kalin khawtlang hruaitute nen inkawm hona an nei bawk.

Tournament hawnnaah hian Minister chuan, infiammite chu khawiah pawh mahni inthunun theihna nei reng turin a chah a, infiamna hi hriselna atan that bakah eizawnna atana tlak anih bawk avangin thawhrimna nena kan beih chuan hlawhtlinna a hmuh theih a ni, a ti. Thalaite chu mipat hmeichhiatna leh ruihlo lakah fihlim tura chahin, ruihlo do kawnga hma la thintute theih tawp chhuahpui zel turin kalkhawmte a sawm bawk.

Hemi hnu hian Er. Lalrinawma chuan Chhuanthara hmasawnna hnathawh hrang hrang te tlawhin, Carpentry Co-operative Society ten hmunhma leh Charcoal Making Society ten meihawl siamna an dinte chu a tlawh a. Thawktute leh society member te nen inkawm khawmna te an nei bawk. Member te chu an eizawnna leh an sumdawnna te dan hnuaiah tih darh zau zel a pawimawh thu hrilhin an thil siam leh an thiamnate chu ramchhung mai duhtawk lo a thenawm ram leh ram changkang zawk thlenga thawn chhuak thei turin inbuatsaih tul a tih thu a sawi a ni. Carpentry Co-Operative Society Project Cost hi avaiin 530 lakh a ni a, MSME (Micro Small Medium Intreprenuership) atanga pek an ni.