3917/2022-2023

Champhai, the 21st March, 2023: Vawiin khan Champhai Police, 42 Assam Rifles, NYK Champhai leh Govt. Champhai College-te tangkawp buatsaihin Champhaiah Drug Free Mizoram and Drug Free India March huaihawt a ni. Pu Gaurav Tyagi IPS, SDPO Champhai chuan kawngzawh turte a vai liam a; ruihhlo do pual inzirtirna kaltlang hian Champhai Bethel kawn atanga Champhai Police Station, Vengsang thleng kawng zawh a ni.

He hunah hian ruihhlo ti lo tura inzirtirna tlangaupui niin, ruihhlo tih leh hemi kaihhnawiha inhnamhnawihin mahni chauh nilo chhungkua, khawtlang leh ram puma nghawng thalo tak a thlen dante auchhuahpui a ni a. Kawng zawhah hian damdawi ti lo tura inzirtirna tlangaupui niin, ruihhlo zuar leh a tawlh thin hriate chuan thuneitute hnena hrilh vat zel tur te, Champhai chu ramri-a awm a nih avanga ruihhlo kalkawng a nih avangin awlsam taka hmuh mai theihin ruihhlo tam tak awm mah se, ti chhin lo tura mipuite ngenna siam a ni a. Mipuite chu Police mit leh beng an nih theih thu leh ruihhlo do rem a nih theih nana thurualpuia sawmna thute tarlan a ni.

Ruihhlo do kawngzawhna hunah hian SDPO Champhai Pu Gaurav Tyagi IPS, Pu Dinesh Jangid, NYK District Youth Officer, Captain Faisal Ali, 42nd Assam Rifles, Pi Lalfakawmi, Asst. Professor, Govt. Champhai College, Police Officer dangte bakah Govt. Champhai College zirlaite, NYK volunteers, Police leh Assam Rifles sipaite an tel a ni.