3916/2022-2023

Aizawl the 21st March 2023 : Vawiin khan Deputy Chief Minister Pu Tawnluia, UD&PA changtu chuan High Field Multipurpose Playground lungphum a phum. He hunah hian Aizawl North III bialtu MLA Pu C.Lalmuanpuia, Aizawl Deputy Mayor Pu R.Thanglura leh sawrkar hotulu dang te an tel a ni.

Pu Tawnluia chuan High Field tihhmasawnna leh tihchangtlunna, khawtlang mipui te tana tangkai tak tur bultanna lungphum phum a ni ta chu lawmawm a tih thu a sawi a. Infiammite, thalaite leh kum upa zawk te tan pawha insawizawina hmun remchang siam a ni dawn a, motor tam tak lenna tur parking tha tak siam a ni dawn bawk a, khawtlang tan leh kohhran tan pawh thil tangkai tak a ni dawn a ni, a ti. Sawrkar laipuiin khawpui tihhmasawnna Smart City project kalpuina tur khawpui za a thlan zingah Aizawl khawpui a tel ve tih sawiin Deputy Chief Minister chuan Smart City hmalakna hnuaiah Aizawl khawpui chhungah hna engemawzat thawh mek a ni, a ti a. Project thawh kal lai mek 30 chuang awmin heng zinga thenkhat hi tihpuitlin a ni tawh a, project sawm dawn lai chu estimate siam zawh tawh niin tender hma bak a la awm bawk, a ti a. Hmalak mai tur chhawpchhuah zinga langsar tak Laldenga Cultural Centre, Lammual sira sak tur pawh a lungphum phum turin Union Home Minister Pu Amit Shah a lo kal dawn tih Pu Tawnluia chuan a sawi. Tunhma atanga infiammite leh zirlaite tual chaina High School Field siamthat a, tihchangkanna tur bul tan a ni ta chu a lawmawm tak zet a ni, khuallian chuan a ti bawk.

Pu C.Lalmuanpuia pawhin he project pianna tur atana theihtawp chhuaha tan la tute zawng zawng chungah lawmthu a sawi a. Bialtu MLA a nih anga Zarkawt leh a chhehvel mipuite tana tangkai tur, ruahmanna an thlir lawk zinga pawimawh tak tihhlawhtlin a ni dawn ta, a ti a. Chief Minister leh Deputy Chief Minister te, sawkar leh khawtlang mipui te thawhhona avangin project rotling tha tak duan chhuah niin, bultan a ni ta chu lawmawm a tih thu a sawi a ni.

Kum 2022, July 20 ah Education Department in phalna a tihchhuah hnuah he project hi thawh tan a ni a. Cheng vaibelchhe 16 senna tur niin Contractor ah M/S Lushai Engineers hman a ni. He Multipurpose Playground chhungah hian 73x33M a zau playground, cricket pitch, outdoor gym, cycle track, elevated jogging track, naupang intihhlimna tur hmun bakah ke pali nei lirthei 80 leh ke pahnih nei lirthei 47 park theihna tur hmun te a keng tel dawn a ni.

Vawiin lungphum phumna puala inkhawm hi Zarkawt Community Hall ah buatsaih a ni a. UD&PA Secretary Pu Lalmalsawma’n a kaihruai a. Aizawl Smart City Ltd. Chief Executive Officer Pu Lalrothanga’n technical report a pe a. Zarkawt Local Council Chairman Pu Lalawmpuia’n lawmthu sawiin hun hnung a khar a ni.