3915/2022-2023
Vau thla ni 21, 2023: Vawiin khan Lawngtlai District Level Coordination Committee on Tobacco Control chu Lawngtlai DC Conference Hall-ah Additional Deputy Commissioner Pu Abraham Beirazi Khithie hovin an ṭhu khawm.
He hunah hian Lawngtlai Chief Medical Officer Dr LP Malsawma chuan kal khawmte lawmna thu sawiin, vaihlo dona kawngah National Tobacco Control Programme (NTCP) leh department hrang hrangte ṭan rual a pawimawh thu a sawi a. State Nodal Officer (NTCP) Dr Lianthangpuia chuan vaihlo zuk leh hmuam lo ti tawhte chuan sim tum a, sim thei lote pawhin an bula mite tana hnawksak lo tura inthiar fihlim nachang hriat a pawimawh thu a sawi a. State Consultant (NTCP) Pu R. Lalremruata chuan zirna in zawng zawngte zuk leh hmuam tih lohna school (TOFEI)-ah puan a nih theih nan School Education lama hotute chu ṭan lakpui tura sawmin, demand a san chuan supply a san ṭhin avangin demand titlem turin prevention lama ṭan lak a ngaih thu leh chumi atan chuan naupangte hnena zuk leh hmuam ṭhat lohzia zirtirna kawngah uar zawka hma lak a ṭul thu a sawi a ni.
NTCP Lawngtlaia District Consultant Dr Christine Chhuanmawii chuan NTCP Lawngtlai District activity report a pe a. April 2022 aṭanga March 2023 chhungin vaihlo ṭhat lohzia inzirtirna ṭum 76 buatsaih a ni a, chu'ng chu sikul hrang hrangah vawi 32, naupang inkhawmah vawi 6 leh vantlang inkhawmah vawi 38 te a ni a. Anti Tobacco Squad Drive vawi 78 kalpui niin, dan bawhchhia mi 25 man an ni a. Hemi hun chhung hian District Hospital Lawngtlaia Tobacco Cessation Clinic-ah vaihlo nghei tum inziak lut mi 353 an awm a ni.
He meeting-ah hian Health Department, Education Department, Police Department, CYLA, MHIP, LWA leh LSA aṭang te'n member an kal khawm a. Vaihlo dona kawnga Lawngtlai District-a hma lak zel dan tur te sawi ho a ni a. NTCP Lawngtlai District Nodal Officer Dr S. Thaizi chuan lawm thu sawiin, meeting hi a khar a ni.
Attachment
- Loading attachment...
