3914/2022-2023

Aizawl the 21st March 2023 : Vawiin chawhma khan Sports and Youth Services Minister Pu Robert Romawia Royte chuan ‘Seminar on Revisiting Mizo poetry’ World Poetry Day PUC Seminar Hall a neih chu hmanpuiin Mizo Poetry Society buatsaih ‘Zaikungthar Volume-5’ a tlangzarh nghal.

He Seminar on Revisiting Mizo Poetry, World Poetry day denchhan a neih ah hian khuallian Minister Robert Romawia Royte chuan thu sawiin tawng hi hnam ropuina a ni a ti a, Mizo in tawng chi hrang hrang a nei chu hnam ti hausa tu a ni, a ti bawk. Chutihrualin tawng hman tlanglawn tur a awm chu tha a tih thu a sawi a, hemi kawngah hian Mizoram in kan hman tlanglawn ber Duhlian tawng chu 8th Schedule ah chuang ve ngei se a duh thu a sawi bawk.

Minister chuan mizo tawng in a constitutional safeguard 8th schedule hmanga a neih chuan , kawng hrang hrang ah hmasawnna a awm dawn a ni, a ti a. Research beitute , thuziak mi te leh sumdawnna thlengin awlsam zawkna a thlen anga,Mizoram MP te pawh in Parliament ah mahni tawng ngeiin thu an sawi thei tawh anga, thalai te pawhin UPSC Mains optional-ah literature subject pakhat ah an hmang thei dawn bawk a ni, a ti.

Khuallian chuan khawvel ram changkang zawk ten tawng chu an ngaihhlut thu sawiin, mi in tawng hmangin ram zau tak tak an la a ni, a ti a. English leh French ho in a an tawng avanga an hausakna pun dan chu mithiam ten chhut harsa an tih khawp a ni, a ti. Tawng chu hnam anga min phuartu leh kan nihna ti chiangtu a ni, a ti a. Mizo in thu leh hla hausa tak tak kan nei thin a, chungte chu kan ngaihhlut thiam a pawimawh a, thu leh hla ropui tak tak phuah chhuak leh tu ni turin kalkhawmte chu a fuih a, lehkhabu chhiar uar zual sauh sauh turin a fuih. Mizo hnam a awm chhung chuan Mizo Poetry Society chuan Mizo te ah hmun pawimawh tak a luah zel ang tih a beisei thu a sawi bawk.

He World Poetry day seminar hi Mizo Poetry Society (MIPOTY) leh Department of Mizo, Pachhunga University College tangkawp a buatsaih niin, MIPOTY members-te leh Pachhunga University College leh ICFAI University zirlai te an kalkhawm a. Pu C Vanhmingliana, Vice President MIPOTY in inkhawm hi a kaihruai a, Pu H Laldinmawia Secretary in report pe thungin MiPOTY chuan ram chhung leh pawn ah member 200 dawn an neih thu a sawi a. An program hi MIPOTY Youtube channel a en nawn theih tura buatsaih a nih tur thu a sawi bawk. Program hi session hnih ah then ni in, chawhnu lamah hruaitu thar thlanna neih a ni.