1126/2023-2024

Khawzawl, 13th July 2023: Khawzawl District Sericulture Office chu vawiin khan Sericulture Minister Er. Lalrinawma chuan a hawng a. Veterinary, Fishery & Sericulture Board Vice Chairman Pu C. Lalmuanpuia chuan he hun hi khualzahawm niin a hmanpui bawk.

Hawnna inkhawm Khawzawl Electric Veng YMA Hall-a neihah Sericulture Minister chuan Khawzawl District-in hmasawnna tam tak a hmuh thu leh fu ke kima a din chhoh mek thu a sawi a. Mizoram sawrkar chuan District thar te hmasawnna a ngaipawimawh a ni, a ti. Sawrkar department dang te pawhin Khawzawla inbun chhoh zel an tum thu sawiin Minister chuan karleh lamah District Veterinary Office hawn tum a nih thu leh Excise & Narcotics Department pawhin District thara inbun phalna an dil mek thu a tarlang.

Er. Lalrinawma chuan Khawzawl District mipuite chu Sericulture Office thar an neih a lawmpui thu sawiin, changtlung zawka Sericulture Department-in hma a lak theih nan an tawiawmna a ngen nghal a. Silk pangang khawi chu eizawnna ngelnghet leh tlo, hralhna (market) a hnawng ve lo a nih mai bakah ram sum leh pai dinhmun tihhmasawnna kawngah a pawimawh em avangin sawrkar laipui pawhin a ngaipawimawh hle a ni, a ti. Silk tha leh manto ‘Muga Silk’ chinna atan India hmarchhak ram chu duhthusam a nih thu leh a tharchhuak hnem ber Assam-in sik leh sa inthlak vanga harsatna a tawh mek avangin Mizoram tan kawng tha a inhawn thu Minister chuan a sawi a. Mizoram khaw 800 chuang zinga khaw 200 vel chauhin silk an la buaipui chu beitham deuha a hriat thu sawiin, uar zawka kalpui a duh thu a sawi bawk.

Khualzahawm Pu C. Lalmuanpuia pawhin he hunah hian thu sawiin Khawzawl District-in hmasawnna hmel a hmu zel chu a lawmawm hle a ni, a ti a. District Sericulture Office hawn a nih theih nana hma la tu Bialtu MLA Deputy Chief Minister Pu Tawnluia leh a changtu Minister chungah lawmthu a sawi bawk. Khawzawl District leh a chhehvel chu silk chin nana ram tha tak a nih thu sawiin kuthnathawktute chu India ram mai ni lo, khawvel dengchhuaktu nih tum theuh turin a sawm a; District Sericulture Office kal zelna turah duhsakna a hlan nghal bawk.

Khawzawl DC Pu K. Lalrohlua chuan District Sericulture Office hawn a ni ta chu Khawzawl district aiawhin lawmthu a sawi a. District office tinunga tichak tur chuan mitinin pawimawhna an nei a ni tiin, mipuite thawhpuina leh tawiawmna a ngen.

Hawnna inkhawm hi Sericulture Department Secretary Pu C. Lalrosanga chuan a kaihruai a. Director Pu V. Zothansanga chuan report pein, Joint Director Pu Lalrinawma chuan lawmthu sawina hun a hmang bawk.

Khawzawl District Sericulture Office hi NABARD (RIDF XXVI) hnuaia sum hmuh cheng nuai 31.04 senga sak a ni a. Building hi chhawng hniha sang, square meter 83.54 a zau niin Cocoon Storage Center, District Sericulture Officer room, Computer Room leh Establishment Room te a awm a ni.