1125/2023-2024

Champhai, the 13th July, 2023: Nodal Agency Impulse NGO Network leh State Partner Cod Nerc-te tangkawp hmalakna kaltlanga dawn, hriselna kawnga hmanrua (Medical Equipment) thahnem tak chu vawiin chawhma dar 11 khan Champhai District Bawrhsap Pu James Lalrinchhana chuan Health & Family Welfare Department, Undivided Champhai District hnuaia Damdawiin 16 bakah Sub-Centre leh Health & Wellness Centre 59 te'n a tul anga an hman theih turin a hlan a; hmun hrang hranga hman turte chu Nursing School Building kawt atangin a vailiam a ni.

Khuallian District Bawrhsap Pu James Lalrinchhana chuan tanpui ngaite tanpui tura penchhuak Impulse NGO Network leh Cod Nerc-te hmalakna chhuanawm a tih thu leh an hnathawhte a lo hriat tawh thin thu a sawi a. Mangang tak takte chu an dinhmun ang tawn loh chuan an harsatna tawhte hriat fiah a har thu sawiin, tanpui ngaite tanpui kawnga sawrkar tha ti chaka pen chhuak thin NGO te fakawm a tih thu a sawi a. Raltlante chhawmdawl kawnga mualpho lova tun thenga kan awm hi kan zavaia tanrualna vang chauh a ni a, kan chhawmnun zel pawh a tul hle dawn a ni, a ti a. Raltlan dinhmun remchangah laa mihring hmanga sumdawnna emaw, an chunga hleilenna thlen a awm loh nan tanlak a ngaih thu sawiin, sawkarin theihtawp a chhuaha tun thlengin Champhai District-ah harsatna a awm lo nia hriat a ni, a ti a. Champhai District-ah Myanmar atanga raltlan 12,209 leh Refugee camp 34 a awm mek thu sawiin, heng zinga 3,546 hi hmeichhia niin naupang 4,830 an awm a. Ei leh in mai bakah an sahimna ngaih pawimawh a tul thu sawiin, a bikin hmeichhia leh naupangte enkawl kawngah tanlak zual a ngaih thu a sawi bawk.

Champhai District Bawrhsap chuan mamawh nghal mai theih medical equipment thahnem tak Impulse NGO Network leh Cod Nerc-te hnen atanga dawn chuan awmze thui tak a neih dawn thu sawiin, hei hian raltlante leh District mipuite hriselna mai bakah thlamuanna a pek a beisei thu a sawi a. An hmalak lehzelna turah phur taka kal a, midangte tana malsawmna nih chhunzawm zel turin a chah bawk a. Raltlan chhawmdawl kawnga sawrkar tha ti chaka tha thawhtu NGO, Kohhran, pawl leh mimal inphal tak takte chhuanawm a tih thu sawiin, hun lokal zel turah pawh lungrual taka tanrualpuiah a sawm nghal bawk a ni. Myanmar atanga raltlante chhinchhiahna runpui biography & biometric kalpui chhoh thuai a nih thu leh September thla chhunga zawhfel hman tum a nih thu sawiin, hemi kawnga tawiawm turin raltlan, khawtlang hruaitute leh NGO hotute a ngen nghal bawk a ni.

Thusawitu dang SMO Champhai Dr. Vanzarliani chuan State pawn atanga sahimna zawnga raltlan Mizoram pantute'n hriselna tha an neih theihna tura Impulse NGO Network leh Cod Nerc te'n phal taka chhawmdawlna hmanrua thahnem tak an pe chu lawmawm a tih thu a sawi a. Hriselna kawnga hmalaknaah nasa taka a puih theih dawn thu tarlangin, nakin zelah pawh thawhhona tha tak chhawmnun zel a nih a beisei thu a sawi bawk.

Hemi puala Nursing School Building Ground Floor-a hun hman hi Pu C.Lalmuanthanga, State Team Lead, Impulse NGO Network (INGON)/ Chairman, Cod Nerc chuan a kaihruai a. Pi K.Vanlalruatzeli, District Program Manager, INGON in hunserh a hmang a. Pu Jonathan Kevin Rynghang, Database Management Support, INGON in hmalakna tlangpui tarlangin program neih chhante a sawifiah a. Pu Lalchhuanawma, Treasurer, Sub-Hqrs. YMA Champhai leh Pi Lalhmachhuani Varte, President, Sub-Hqrs. MHIP Champhaite'n thu an sawi bawk a. Pu Mewaki Khongwir, Database Management Support, INGON in lawmthu sawiin hun hman a khar a ni.

Vawiina hmanraw inhlan zingah hian bed emergency relief patient 100, vinyl bed surface 99, wheel chair 6, cane forearm 6, crutch pair 29, walking stick 18, surgical mask 3800, N95 mask 10650, caps, shoes cover, hats (surgical) 3487, glove (non-sterile) 12770, gown 2650, IV Catheter (huber butterfly & fistula telin) 476, IV extension & secondary tubing 291, IV Primary tubing (blood tubing telin) 1461, Needle mixed gauge 7000 leh Syringe 3904 te a tel a ni.

Rambuai avanga sahimna zawnga raltlante chhawmdawl kawngah Impulse NGO Network leh Cod Nerc-te hian kum 2022 January atang khan Champhai District-ah hma an la tan tawh a; ei leh bar pek, thlai chin, thiamthil zirnate leh tul dangte an kalpui thin a ni.