3300/2022-2023

Dated Serchhip, the 19th January, 2023: Vawiin khan Er. Lalrinawma, Minister SW & TA, AH & VETY, E&ND, Sericulture, etc., chuan Tawi Tlang Block MHIP Conference vawi -11 na, Hualtu khuaa neih chu khuallian niin a hmanpui.

Er.Lalrinawma chuan, hun tha petu Pathian hnenah lawmthu sawiin MHIP members-te conference chibai a buk a. Hmeichhiate chhungkua, khawtlang, ram leh hnam thilah an pawimawhzia hi sawifiah phak a ni lova, an sukthlekin nasa takin kawngro a su zel thin, a ti. Ram leh hnam huap thilah pawh MHIP ten hmalakna ropui tak tak an nei tawh thin a, an chhunzawm zel pawh ka beisei a ni. Kan fate hnenah ngaihhlut tur dik kan zirtir uar a tul hle mai a, ram mipuiten nunkawng dik kan zawh deuh deuh theih nan mahni fate theuh hnena taima taka kan tuh thin a tul hle a ni. Hnam dang nena inchimralna laka kan him theihna tur kawngte, mahni hnam ziarang hlut thiamna lam thilte, Zonun zemawi inzirtir zelna lam te pawh kan uar zel tul a tih thu member kal khawmte hi a chah a ni. National Girl Child Day chu January 18-24 chhungin India ram pumah hman mek a nih thu sawiin Minister chuan, Beti Bachao Beti Padhao Scheme kaltlanga hman a ni a. Fanute venhim leh zir puitlintir chu Beti Bachao Beti Padhao thiltum pui ber a nih avangin vawiina Conference in thupui, “Tu leh fate ruihhlo laka fihlim tura tan lak” tih nen pawh a inmil hle a ni, tiin BBBP hmanga sawrkar hmalakna kal mek te pawh a tarlang a. BBBP chu hmeichhe naupangte hmasawnna tura sawrkar laipui hmalakna pawimawh anih avangin MHIP member te pawhin ngaihven deuh deuh se a duh thu a tarlang a ni.

Inkhawm hi Pi Lalsiamkimi, President Tawitlang Block chuan kaihruaiin, Upa Lalnunmawia’n hunserh a hmang a. Sub-Headquarter, Serchhip leh General Headquarters, Aizawl atangin hruaituten rawn hmanpuiin thusawina hun an nei a. An member boral mi 67 te sunna hun an hman bakah hruaitu hlun chawimawinate an buatsaih a. Pu Zoramliana, Adviser hnen atangin “Naupang enkawl dan leh ruihhlo that lohna” tih thupui hmanga thusawi an ngaithla bawk. MHIP Tawi Block huam chhungah hian Branch 19 an awm a ni.