3301/2022-2023

Pawlkut thla ni 19, 2023: Vawiin khan Lawngtlai District Agriculture Office huaihawtin DAO Conference Hall, Lawngtlaiah International Year of Millet (IYM) 2023 pualin buhtun (millet) ṭhatna leh ching uar tura inzirtirna hun, "Training on Importance and Improved Cultivation of Millets for Lawngtlai District" buatsaih a ni.

He training-ah hian Lawngtlai khawpui chhunga village council ai awhte leh kut hna thawktute an kal khawm a. Lawngtlai DAO Pu V. Zamliana chuan hun kaihruaiin, inlawmna thu a sawi a. Sawrkarin agriculture kaihhnawiha ruahmanna ṭha tak tak a duante chu department-a thawktute ṭhahnem ngaihna ringawtin tihhlawhtlin theih a ni lo va, kut hna thawktute thawhpuina ṭha tak a awm a ṭul a ni tiin, kut hna thawktu kal khawmte chu department kal tlanga sawrkar hma laknate thlawp tlat tur leh ṭha taka thawhpui turin a sawm a. Kut hna thawh chungchangah tunlai thiamna leh zir chianna te chhawr thei turin department-a mi thiamte rawn peih a, an thurawn lak thiam turin a chah a ni.

Keynote address sawitu Sangau Block Agriculture Officer Pu H. Lalbiaknia chuan kum 2023 hi India Sawrkarin a rawtna angin United Nations (UN) hnuaia Food & Agriculture Organisation (FAO) chuan khawvel puma buhtun chin uar kum, "International Year of Millet"-ah a puan thu leh chumi tihhlawhtlin nana kut hna thawktute zirtir tura training buatsaih a nih thu a tar lang a. IYM puan chhan ber chu mihring hriselna atana buhtun a ṭhat em avang leh ram rethei zawkte tan pawh ei leh bara intodelh nana a pawimawh em avanga ching uar tura inzirtirna leh vawrh larna atan a nih thu a sawi.

He hunah hian Lawngtlai ADAO Pi Vanlalngaii chuan "Importance of Millets" tih thupui hmangin buhtun chi hrang hrangte mihring hriselna atana a ṭhatna leh ei leh bara intodelh nana a pawimawhna te, chin atana a thlanawmna chi hrang hrang te a zirtir a. Krishi Vigyan Kendra (KVK) Lawngtlaia Senior Scientist & Head Dr C. Lalfakawma chuan "Cultivation Practices of Millets" tih thupui hmangin buhtun chi hrang hrang chin dan leh enkawl zui dan te, zuva laka venhim dan te a zirtir bawk a. Zawhna leh chhanna leh sawi hona hun hman zui niin, kut hna thawktu kal khawmte'n hriat chian duh an neih an zawh bakah, buhtun lam chi - buhtun, faisa leh mim an lo chin tawh aṭanga an tawnhriatte an sawi a. Lawngtlai ADAO Pu J. Sanghlira'n lawm thu sawiin hun a khar a ni.

India Sawrkar chuan hriselna atana buhtun ṭhatzia hriain kum 2018 khan buhtun chu "nutri-cereal" (buh hrisel) tia a hming phuahin, thar tam turin ṭan a lo la tawh a. Kum 2022 khan Mizoram Agriculture Department pawhin buhtun chin hi hlawhtling taka enchhinin, mihring taksa tana a hrisel piah lamah, lei chhia leh hmun ro a ngam avang te, natna leh ei chhetu lian tham a neih loh avang te, a thar hma avang leh chaw ṭha chi hrang hrang atana hman theih a nih avang te'n Mizoramah pawh chin chi takah ngaiin, hma a lak chhunzawm mek a ni.

IYM 2023 pual hian Sawrkar Laipui chuan hma lakna tur hrang hrang ruahmanin, state hrang hrangah seminar, farmers training leh awareness campaign te buatsaih chhoh mek a ni a. Mizoramah pawh January 16, 2023 khan "State level Flag off Programme on Celebration of International Year of Millet, 2023" chu buatsaih a lo ni tawh a. Vawiina Lawngtlai District pum huapa hawnna ni pah fawma training buatsaih bakah hian, Block hrang hrangah MzSRLM te nen ṭang tlangin training hi kalpui chhunzawm a ni dawn a. Training buatsaih bakah hian hoarding te tarin, awareness campaign leh mela te pawh la buatsaih chhunzawm a ni dawn a. Kumin hian Lawngtlai District-a kut hna thawktute'n buhtun a tam thei ang ber ching tur leh thar chhuak thei tura hma lak tum a ni.

Attachment

  • Loading attachment...