3779/2022-2023

Dated Serchhip, the 8th March, 2023: Nimin khan Er. Lalrinrawna, Minister leh Tuikum Bialtu MLA ni bawk chuan a bial chhunga Khawbel leh Rullam khaw inkalpawhna kawng laih thar a hawng a. A lawmna inkhawm Khawbel Community Hall a buatsaihah khuallian niin hun a hman pui.

Er. Lalrinawma chuan, mipuite'n eizawnna ngel nghet an neih chu a ngaih pawimawh ber a nih thin thu a sawi a, MLA Fund pawh a bial chhung khaw hrang hrangin a tangkai thei ang bera an chhawr theihna tur nia a hriatah a hman thin thu tarlangin, khawtlang hruaitute nen fel takin rem an ruat thin tih a sawi a ni. Hmathlir thui tak neia khawtlang enkawl thiam a pawimawh thu sawiin kan ngaih hlut zawng hi kan kan thiltihah a lang chhuak thin a ni, a ti.

Khawbel leh Rullam inkar kawng chu chhiat that leh eizawnna lamah nasa taka an tangkai pui ngei a beisei thu sawiin, mipuite chu a chhiat thatah theih tawpa tanpuia, thurawnte pe thin turin a ngen a, duhsakna hrang hrang a dawn thin naah lawmthu a sawi bawk a ni.

HS. V L Thlamuana, Khawbel VCP pawhin thusawiin hmathlir thui tak nei Tuikum Bialtu MLA Er. Lalrinawma zarah leh khawtlang mipuite inpekna avang tun dinhmun thleng thei an nih thu a sawi a. Miten Nghawngkawl area min tih thin chu kan kalsan mek a ni. Vawiina kan khawtlangin hmasawnna kan neih thar hi eizawnna leh nitin khawsak tiawlsamtu a nih ngei ka beisei, a ti bawk.

Khawbel- Rullam inkar kawng hi MLA Fund bultuma laih niin KM-13 a thui a ni.

He hun hi Pu J. Rohmingliana'n  kaihruaiin Pu Thanzika'n hunserh a hmang a, Pu H. Lalchhanhima chuan link-road laih dan report tlangpui a pe a ni.