197/2023-2024

Aizawl, 24th April, 2023 : Vawiin khan Excise & Narcotics minister Er. Lalrinawma, Ruihhlo Do Working Committee Chairman ni bawk chuan Ruihhlo do khuh hawnna hun Assembly Annexe Conference Hall-a neih chu khuallian niin a hmanpui.

Ruihhlo Do khuhawnna inkhawmah hian thu sawiin Er. Lalrinawma chuan ruihlo leh a kaihhnawih harsatna hian Mizoram min run nasa hle a. Ruihhlo hmansual leh dan lova tawlhruk hian mimal leh khawtlang nun a tichhiain, hmasawnna kawng hrang hrang a tithuanawpa, pawikhawihna leh dan bawhchhiatna athlen nasa hle a. Chief Minister Pu Zoramthanga hmalakna in nikum 2022 May thla khan 'Core Committee on Ruihlo do' hi neih a lo ni tawh a, Committee in a lo rel angin Social Welfare Minister ni a ka chairman-na hnuaiah working committee din nghal niin, ruihhlo dona kawngah chak zawk a hmalak a nih theih nan Supply reduction, Demand reduction leh Harm reduction te mumal taka do leh thawhho atul tak zet a ni tih a sawi. Core Committee chairman Chief Minister Pu Zoramthanga, Finance Minister ni bawk remtihpuina in thawhho dan tur te ruahmanna siamin sum mamawh zat te duan a ni a ti a, Working committee hi vawi-3 lai an thut khawm tawh thu asawi bawk a ni. Ruihhlo dona atan kan mamawh ang min pe thei hi kan lawm a, ruihhlo dona kawnga thawktute a ngaih pawimawh zia a tilang chiang hle a ni, a ti bawk. Working committee ruahmanna angin District tinah DC kaihhruaina in Task Force din a ni tawh a, anni hian District leh Village level ah ruihhlo dona kawngah hma chak takin an la dawn a, chutih rualin he ruihhlo do na kawngah hian NGO, Khawtlang, chhungkua, mimaltin kan tanrual tak zet zet a ngai tawh a ni a ti bawk.

He hun hi Pu R.Lalngheta, President CYMA leh Vice Chairman Ruihhlo Do Core Committee chuan kaihruaiin, Rev.R.Lalrintluanga  Vice-Chairman, MKHC in hunserh a hmang a, Prof. Lalnuntluanga Secretary, Ruihhlo Do Core Committee hnen atangin  report ngaihthlak niin, Pu Lalbiakthanga Khiangte, IPS, IGP(Law & Order), Mizoram Police in lawmthu sawina a nei a. He hunah hian ruihhlo dona atan hman turin NGO, Department leh District hrang hrang Deputy Commissioner te hnenah Rs 3,00,00,000/- (vbc 3) sem ral a ni a, he hunah hian District hrang hrang DC leh SP, Mizoram Police, Excise & Narcotics Dept. Food & Drugs Administration, MSACS, CYMA, CYLA leh MTP aiawh an tel a ni.