Er. Lalzirliana, Mamit Bialtu MLA, Vice Chairman Road Communication &  Infrastructure Committee ni bawk chuan Dt 15.6.2019 (Inrinni) khan 132 Kv Line double Circuit Bairabi to W. Phaileng via Mamit Tower phunna tur Foundation hna tanna tur a tlawh.

Bialtu MLA chuan Mizoram leh Mamit District tana mellung pawimawh tak ni tur leh kan chhawr tangkai tak tur 132 Kv line tower phunna tura hna tan a ni dawn ta chu lawmawm a tih thu a sawi a, hunrei tawh tak atangin Mamit leh a chhehvel khua te'n eng pekna lamah harsatna kan tawk a, furpui hun a lo thlenin engtikah nge current a thih ang tiin rilru hreawm taka kan awm thinna chu 132kv line tihpuitlin hunah chuan chung harsatna chu a kian a beisei thu sawiin mimal tak pawha lawm berte zing ami a nih thu a sawi. Power & Electricity Department a thawktute chu hna ropui leh hautak tak thawk tura tha thawh thei leh ngaihtuahna sengtu zinga an tel chu vannei intih nachang hre turin a duhthu a sawi bawk.

Pu Zira chuan 132Kv line chu hna hautak leh lian tak a nih dawn avangin a thawh chhung pawh a rei dawn a, Khawthlang hruaitu, NGO hrang hrangte chu Department te thawhpui tlata hna tichaktu atana tanpuitu ni turin a sawm bawk a ni.

Pu F.Rinpuia SE, P&E pawhin thusawiin Mamit District chhung khua te'n an chhawr theih tur 132Kv line hna thawh a ni chu an vanneih thu a sawi a, hna puitlin a nih hnuah phei chuan District Capital Mamit tan phei chuan eng chawk luhna hmun hnih atang an neih tawh dawn avangin Power lama harsatna chuan ziaawm lam a pan tawh ngei dawn a ni a ti.

132Kv Line Bairabi to W. Phaileng via Mamit hna thawhna atan hian North Eastern Council (NEC) sum atang Rs 5495 lakh senga hnathawh a ni dawn a, tunah hian Electric ban phunna tur khur 81 zet thawh zawh tawh a ni.

Sub Station Tower Foundation sak tanna hmun Bialtu MLA in a tlawhnaah hian Pu F. Rinpuia SE, P&E, Pu Thanglura Sailo EE, P& E Mamit leh khawtlang hruaitu te'n an tawiawm a ni.