563/2022-2023

Mamit 20th May, 2022 : Vawiin khan Er. H. Lalzirliana, Mamit bialtu MLA, Vice Chairman, Road & Infrastructure Development Board chuan Gov.t Mamit College VI Semester zirlaite puala buatsaih Finishing School (One Week Orientation) chu khuallian niin a hmanpui. 

Khuallian chuan zirlaite chu an ngaihtuahna tisang tura chahin mahni  inhmuh dan aia sangah a chhuah theih lova, khawvel chu a che chak chakte dinchanna anih avangin remhre taka che chak turin zirlaite a fuih a. Ruihtheihthil laka fihlim a, kawng dik taka chak taka kal tur leh mahni nih lohna anga lang lo turin a chah. An thiamna te hmasawnpui tlaka tipung zel tur leh suangtuahna ropui tak nei a, mu thei lo khawpa chu an suangtuahna chu tipuitling tura ngaihtuahna seng turin a chah bawk. 

He hun khualzahawm ni-a hmanpuitu Pu Lalnunhlua, District Bawrhsap pawhin thu sawiin College zirlaite chu mahni zawn theuha mibik kan nihna leh Pathianin talent min pek theuhte zahpuilo a, tipunga remhre taka hman thiam a tul thu sawiin midangte thiamna entawn lova keimahni ngeiin thiamna leh theihna kan neihte haichhuak thiam tura chahin, mahni inbum lo turin a chah bawk.

Dr. Joseph C. Lalremruata, Programme Coordinator chuan Report tlangpui pein Pu M.S Dawngliana Hnamte, Principal, GMC pawhin Keynote Address a pe bawk. 

He hunah hian khuallian Er.H.Lalzirliana chuan College Magazine tlangzarhin Govt. Mamit College NCC te tan Track Suit a hlan nghal bawk.

Govt. Mamit College hi Kum 1983 a din niin April, 1993-ah Deficit a hlankai a ni a. October 2007 atangin Provincialized a ni. Kumin 2022 hian National Assessment & Accreditation Council (NACC) chuan B+ Grade a pe a. Tunah hian Subject 7, English, Mizo, Political Science, History, Economics, Education leh Geography te a zir theih a. Tuna Orientation hi zirlai naupang leh Alumni Association tan athlawnin a chhim theih a. Pawnlam mi tan Rs 300/- registration fee chawiin a chhim theih bawk a ni. 

Orientation Programme-ah hian heng topic hrang hrang Entrepreneurship as Life Skills, Government Job Opportunities : An Experience Sharing, Career in Banking Sector & Financial Literacy, Laws with a Graduating Student, Youths in Agriculture, Reproductive & Sexual Health, Livestock Entrepreneurship, Service with Honour : Careers in Law Enforcement, Physical, Mental & Social Health, Academic Research Process  te hi anmahni zawn theuha mi thiamte'n zirtirna an pe dawn a ni. 

Vawiin hun hi Pu K.Vanlalnghaka, Associate Professor, GMC chuan kaihruaiin Dr. Lianhmingthanga, Asst. Programme Coordinator chuan lawmthu sawina a nei bawk.