564/2022-2023

Champhai, the 20th May, 2022: Tuipuiral Block Mizo Hmeichhe Insuihkhawm Pawl (MHIP) Conference tum 25 na leh Silver Jubilee lawmna hun Khawbung Community Hall-a neih chu vawiin khan East Tuipui bialtu MLA Pu Ramthanmawia, Vice Chairman, Bamboo Link Road Board chuan khuallian niin a hmanpui.

Khuallian Pu Ramthanmawia chuan MHIP te chu Mizo mipui hringtute an ni a, Mizo hnam hmasawnna leh ropuina chungchangah mawhphurtu lian tak an ni, a ti a. Inkhawmpui thupui thlan 'Tu leh fate, ruihhlo laka venhim leh chhanchhuak tura tan lak' tih chu thupui pawimawh tak a nih thu sawiin, MHIP member-te chu Mizo hnam dinchhuah leh ral kawngah mawhphurhna sang tak an neih thu leh naupang enkawl seilen kawngah  mawhphurhna lian tak an neih thu tarlangin, Mizo hnam dam nan, Mizo hnam ropui nan, Mizo hnam hmasawn nan MHIP member, fanau enkawl mekte chu theihtawp chhuah turin a fuih a. 

Pu Ramthanmawia chuan bial chhunga hmasawnna chi hrang hrang ruahmanna kal mekte tarlangin, cheng vaibelchhe 28 hmanga  Eklavya Model Residential School Khawbunga din tur te, Khawbung Bazar building sak turte, Khawbung Mini-Sports Complex-a phul lem phah a nih tur thu te leh bial chhung khaw engemaw zatah nizung chakna hmanga tuilakna tur ruahman a nih tawh dan leh, zirna in leh thawktu indaih lohna hnawhkhah a nih dante a sawi a ni.

He hunah hian khualzahawn SBI Champhai Chief Manager Pu Revise L. Pachuau bakah hian Tuipuiral Group YMA, Tuipuiral Zirlai Pawl leh Khawbung VCP te’n thu an sawi bawk a ni.

Tukin khan Block MHIP Silver Jubilee lungphun chu Pu Ramthanmawia’n a hawng a, Tuipuiral Block MHIP Run sak chu chhunzawm a nih theih nan a tul anga bawhzui a nih tur thu a sawi a ni. 

Attachment

  • Loading attachment...