965/2023-2024

Mamit 28th June, 2023 : Vawiin khan Govt. Rawpuichhip High School chuan an School Auditorium-ah a zawna kum 4, High School leaving Certificate(HSLC) Examination result 100% Pass percentage an neih lawmin Er. H Lalzirliana, Bialtu MLA, Vice Chairman, Road & Infrastructure Development Board chu khuallian niin hun a hmanpui a. Pu Laldingliana DEO, Mamit District chu khualzahawm a ni.

Khuallian Bialtu MLA chuan Govt. Rawpuichhip High School-in a zawna kum 4 lai mai, HSLC result-ah 100% Pass Percentage an nei thei chu a ropui takzet a, Zirtirtute inpekna, Zirlaite thawhrimna leh khawtlang anga tanrualna avang a ni a ti.

Khuallian chuan zirna kalphung tha zawk a awm theih nan Mizoram Sorkar hmalakna avangin Zirna kawngah ramin hma kan sawn nasa hle a. Kan buaina lian tak Zirtirtu indaihlohna chu Sorkar chuan SEDP hmangin a chingfel a, a School awmna khua ami ngei zirtirtu lak an ni a, chung chuan zirnaah hmasawnna a thlen nasa hle a ni a ti. Pass that mai duhtawk lo a, chhawr tlak ni tur leh Competitive examination rilru hawia mi hlawhtling tak ni turin a chah a. A tul huna kal chhuak ngam tura chahin ram leh hnam hmangaihna thinlung pu turin a chah bawk a ni.

Khuallian chuan Zirtirtu hna chu hna zahawm leh ropui tak a ni a, zirna In chu zirlai naupangte tana nungchang zirna hmun a nih avangin Zirtirtute pawhin kan nungchang kan uluk hle tur a ni a, Zirtirtute chu Party Politics-ah te an inrawlh ve a rem lo a. Zahawm tak leh entawntlak tak nun nei turin a chah bawk a ni.

He huna khualzahawm Pu Laldingliana, DEO Mamit District chuan Mamit District-ah Zirna-in hma a sawn ve zel a. Hmasawnna a hmuh zel theihna atan thawktute pawhin theihtawp an chhuah a, Govt. Rawpuichhip High School chu Mamit District huap pawha School tha ber pawl leh entawntlak tak an nih thu a sawi.

He hun hi Pu Samuel Lalremthanga chuan kaihruaiin Pu C. Lalngaihzuala chuan Report a pe a. Headmaster Pu P Rohmingthanga chuan inlawmna thu a sawi bawk a ni.

Govt. Rawpuichhip High School hian HSLC Exam 2019 atanga 2023 thleng hian 100% Pass percentage an nei a. Tun dinhmunah hian Zirtirtu nghet 3, Samagra Teacher 2 leh SEDP Teacher 2 an awm mek a. Zirlai 65 an awm mek bawk a ni.