3542/2022-2023

Aizawl 10th February 2023: Vawiin khan Women and Child Development Minister Er.Lalrinawma hovin National Deworming Day hawnna programme chu PC Girls School, Aizawlah neih a ni.

Minister Er.Lalrinawma chuan National Deworming Day hawnna thu sawiin he ni hi naupang zawng zawngte puala ruahman a nih avangin rulhut umbo a nih theih nan an tu leh fate zawng zawng rulhut hlo lo ei tir theuh turin mipuite a chah. Naupangte an lo hrisel theihna turin rulhut laka an fihlim a pawimawh a, ei hrisel ringawt a tawk lo a, an thil tha ei te awmze neia hna a thawh theih nan naupangte rulhut lakah kan ven a ngai, a ti a. NDD denchhen hian sawrkar, zirtirtute leh nu leh pa ten rulhut umbo hna theihtawpin kan thawk dawn a ni, Minister chuan a ti.

Zirlai naupangte chu an taksa enkawl tha turin khuallian chuan a chah a. Pathianin chhia leh tha hriatna min pek hmangin thil tha leh tha lo kan hre vek a, kan thianten thil tha lo an lo ching thin a nih pawhin, mahniin ngaihdan fel tak neiin, sual leh thil tha lo lakah kan inveng tlat tur a ni, tiin zirlai kalkhawm te a fuih a ni.

Khawvel pumah naupang maktaduai 836 te hi rulhut pai thei dinhmunah an ding a, India ramah chuan naupang maktaduai 241 te hi rulhut pai thei dinhmunah an ding niin mi thiamte chuan an chhut a. Chuvangin, naupangte rulhut laka an fihlim theih nan kum 2015 atang khan India ramah National Deworming Day hmang tanin nasa takin beihpui an thlak thin a, kum tinin he hun hi ram pumah hman thin a ni. Mizoramah hian kum 2016 ah hman tan a ni a. Mizoram puma naupang kum 1-19 inkarte hmaih awm hauh lovin rulhut damdawi - albendazole mum ei tir theuh tum a ni.

National Deworming Day hi Mizoram District zawng zawngah a ruala hman a ni a. Sikul kal leh kal lo, sawrkar leh private school a kal zawng zawng te a huam vek a. He damdawi albendazole hi sikulah leh Anganwadi Centre ah a thlawnin ni ruat bikah ei theih a ni.

NDD hi Health Department, School Education Department, Women & Child Development Department, Rural Development Department leh PHE Department te tangkawpin an buatsaih a. Vawiin hawnna programme ah hian NHM Director Dr.Eric Zomawia chu chairman a ni a. Thusawi leh presentation te thlir leh ngaihthlak ho a ni a. Dr Lalzepuii, Director of Health Services chuan lawmthu sawiin hun hnung a khar a ni.