1676/2023-2024

Aizawl 28th August, 2023 : Vawiin khan Synod Conference Centre-ah Directorate of Women & Child Development bultumin "Zakapa, Fanai Lal" tih thupui hmanga Seminar neih chu Er. Lalrinawma, Minister, SW&TA, AH&Vety, E&N, Sericulture Deptt. chuan khuallian niin a hmanpui.

Khuallian chuan Sailulak leh Khawhri Lal huaisen Zakapa chanchin zira seminar buatsaih a ni thei chu lawmawm a ti a, a enkawl department officers leh staff te bakah Zakapa Award Committee hmalakna leh thawhrimna chu fakin lawmawm a ti takzet a. Kan hnam ziarang zahpui lo a chawinung zel tura kalkawmte chahin minister chuan “hnam ropui leh tha ber kan ni tih hi i pawm tlat ang u” a ti. Lal huaisen Zakapa huaisenzia sawiin miin a nunna hial thapa a khua leh tuite chhan nan ‘ The South Lushai Hills District’ siam thara Superintendent (Bawrhsap) hmasa ber C.S Murray (Marliana)-a'n nula mutpui tur a dil chu lo hnial in silaiin kah a tum phah hial a. Hmeichhiate a zahna chu ngaihsan awmtak a ni tiin kan hnam chin dan a ni lo ti-a a chhanna chu tunlai thangtharte’n entawntlak a ni tih hre turin a chah.

Seminar-ah hian Pu HC Thanchungnunga J, Prof J.V. Hluna leh Pu David R. Lalsawmtluanga te resource person niin paper buatsaihte zirhona neih a ni. Zakapa hi Dokhama fapa pali zinga pathumna niin kum 1839 ah a piang a, Khawri-ah leh Sailulak-ah kum 20 chuang ve ve a Lal hnuin 28th December, 1914-ah kum 75 mi niin Sailulak-ah a boral a ni.

Seminar hi chawhma leh chawhnu session a then niin group discussion leh group presentation-te neih a ni a. ATC leh College hrang hrangah Mizo subject zirlai bakah NGO leh Institution hrang hrangah mithiamte Group 10-ah inthenin Zakapa chanchin zirho a ni. Zakapa Award hi kumin atangin kumtin ₹.1,00,000/- leh citation, mimal/ NGO/ Institution hnenah hmeichhiate dinhmun chawikan leh humhimna kawnga thawk thate hnen a pek thin tura Directorate of Women & Child Development (WCD) Govt. of Mizoram te'n an buatsaih thin dawn a ni.

Vawiin Seminar buatsaih hi Pi Dony SW&TA Addl. Secretary-in a kaihruai a. Pi Zoramthangi Chhangte, Director, WCD-in an department hmalakna te sawi zauna hun a hmang a. Pi Zonunpari Sailo, Jt. Director, WCD chuan vote of thanks a sawi bawk a ni.